独家丨强尼拍《反起跑》过足凑女瘾 俾「瑶瑶」嗲功冧到爆

继《暖男爸爸》后，强尼再拍ViuTV剧《反起跑线联盟》，今次角色绝对是暖男，除了饰演梁咏琪（Gigi）的好老公，更对个女「瑶瑶」（张曦晨）锡到浓，现实有个10岁囝囝的强尼，私底下一样俾剧中乖女冧爆，他承认拍剧令他过足凑女瘾，遗憾因疫情，完剧后仲未同囡囡再见。采访：杜杜

 

强尼有幸演Gigi老公，他笑言自己够好彩。

 

现实跟10岁囝囝傲乔似朋友相处的强尼，面对剧中囡囡「瑶瑶」的嗲功，除了叫他爹哋，仲帮他改花名「强强」他承认冧到爆，「唔使自己养，但有个女咁大个，系咪好正！」讲到同「阿女」相处，拍屋企戏时被满枱美食吸引的得意样，已令这个「爸爸」好回味，「未roll机，佢就望住啲嘢食吞口水，我话你𠵱家唔好食住，roll机先食，佢试过一次最搞笑系挂住食，唔记得讲对白，见佢食嘢就好开心，佢拍完仲会继续食，真系好得意！」

「瑶瑶」个为食样，在「强强爸爸」眼中就最得意。

 

「瑶瑶」亲自画画送给「强强」，难怪搞到她真爸爸都呷醋。

狂赞「瑶瑶」演技劲

慈父样出晒嚟的「强强爸爸」，忍唔住狂sell「瑶瑶」，「最劲系喊戏，佢系真喊，佢妈咪有套方法可以令到佢喊，有啲magic words咁，佢只要挞着副偈，我哋就算拍一场戏要好多take又转机位，佢妈咪个magic words都唔使再用，停完可以再嚟，超劲，好似㩒pause制咁，只要进入个情绪同状态，take 10 take佢都可以做到，所以话呢套剧，识睇就系睇啲小朋友。」

 

讲起「瑶瑶」，强尼就爸爸上身，不停赞个女。

 

强尼就算俾「瑶瑶」虾，一样觉得好开心。

可惜因为疫情，完剧后强尼仲未有机会再见到「瑶瑶」，想送礼物给「乖女」都未有机会，「煞科嗰日我去唔到，嗰日拍紧第二组嘅嘢撞咗，原本谂住送份嘢畀『瑶瑶』，谂住记招或者咩活动都好，迟啲实会见到佢，点知真系一路冇机会再见，可能下次见到佢已经嫁，要送份结婚礼物畀佢。」

现实中，强尼有个10岁囝囝傲乔，两父子似朋友相处。

现实的「瑶瑶」有个大几岁哥哥，所以比同龄小朋友成熟。

更多第5波疫情资讯，请到以下专页浏览 （按此）

立即下载 | 全新《星岛头条》APP :https://bit.ly/3yLrgYZ