独家丨张伟文逃离鬼门关忍唔住喊暴瘦50磅「断片」唔知病危

2022-03-27 22:30

上月19日，69岁「靓声王」张伟文因所住嘅安老院爆发疫情而感染入院，情况一度唔乐观，幸而留院个多月后康复出院。本周一(21日) 张伟文终能返回安老院舍。《头条日报》记者直击两日，大病初愈嘅张伟文除咗有啲疲态，反应较慢外，仲暴瘦咗超过50磅，肚腩都冇埋，当日「筷子脚」重现，经理人方俊(Aman)形容张伟文瘦到条脊骨冇晒肉好心痛，好彩昔日嘅「饮歌」仍琅琅上口，张伟文保证会为歌迷继续唱歌。采访：方骞平摄影：沈健程

两人一见面就对住喊，恍如隔世，方俊即为张伟文抹眼泪。

张伟文逃离鬼门关，出院后方俊喺茶餐厅重遇张伟文一刻恍如隔世，两人紧握双手，不禁流下男儿泪，喊足几分钟。不过，暴瘦咗一个码嘅张伟文因为「断片」，唔太清楚到底发生乜嘢事，只知太耐见唔到至亲嘅人，眼见对方咁激动而大受感动。

两人喊足几分钟。

出院后的张伟文瘦咗成个码，冇咗肚腩及再现「筷子脚」。

两年前张伟文受腰患困扰，体重曾暴跌100磅得返90磅，惊现「筷子脚」。

确诊前张伟文有大肚腩，要转用手推轮椅。

张伟文最爱食嘢，最重时体重超过200磅。

只记得入院时好冻

用餐期间方俊耐心跟张伟文讲「故事」，又将艺人为佢打气嘅片段播畀佢睇，兼且解释因为长期卧牀，所以背部嘅压疮有两只手掌咁大。伟文一味摇头话唔知发生咁大件事，他脑海仅留残馀片段：「好似发梦，空白咗咁，我只系觉得个背脊好痕好唔舒服，入院当日好冻，stand by入病房时啲人行动好迅速，同埋我有问过啲阿Sir(医护)点解我会喺呢度？之前喉咙夹杂个头都好痛…」方俊为拾回张伟文记忆，问他记唔记得《每当变幻时》点唱？纵使患病期间因为一边肺花晒未完全复元，声线不及以前嘹亮，他依然唱到几句，呢刻又再次搞喊方俊，拭著泪的方俊说：「歌迷、朋友都好担心你，𠵱家冇事喇！」但张伟文对百感交集嘅方俊一脸茫然，焦点竟落喺面前嘅沙嗲牛肉面上，仲食埋方俊柯打嘅鸡翼及薯条，好好胃口。

方俊跟张伟文分享艺人为他打气的片段。

张伟文出院后「队」咗成碗沙嗲牛肉面。

中途突然停低，原来方俊要帮张伟文搲背脊。

一脸疲累但好胃口
住院期间张伟文一度情况唔乐观贴近鬼门关，记者问他惊唔惊？张伟文虽然一脸疲态，但仲带点精灵幽记者一默说：「唔惊！我都见唔到鬼门关。」至于康复后系咪继续唱歌？伟文说：「唔会乱唱，如果人哋叫你就做变咗唔重要，嘥大家时间，为做而做好肉酸，又唔系冇嘢做唔使搞成咁。」方俊见伟文病容表示好心痛：「之前我哋成日带佢出嚟食嘢，体重急升超过200磅，个肚腩顶住个枱，𠵱家病到面口及肚腩都凹晒。」另外，张伟文出院翌日，做完物理治疗后到观塘环星娱乐拍答谢片。记者见他比先前一日更累，不时低头养神唔多讲嘢，由姚炜姐、方丽盈及男助手轮流为他按摩，但当记者追问他录完后想返老人院休息定去食嘢？他即秒速答：「食嘢。」