独家丨梁朝伟首回应会否拍《尚气》续集同蜘蛛仔争影帝行商场睇画减压

2022-02-28 23:00

梁朝伟（伟仔）首度进军荷里活之作《尚气与十环帮传奇》，去年全球票房大收4.32亿美元（约33亿港元），虽然贵为国际级影星多年，但伟仔仍然贯彻低调生活。日前本报记者又在中环见到梁影帝，冇错！伟仔行街路线次次都差不多，今次有少少新鲜感，喺置地过埋ifc间苹果专门店买嘢。着黑色风褛配长裤的伟仔继续孭住个好熟口面嘅蓝色背囊，翻查资料佢已经孭咗5年，都仲好新净。虽然有传佢每部戏收6千万港元片酬，但佢依然悭家，仲好Nice回应记者会唔会拍《尚气》续集𠻹！采访：张咏森

伟仔一支公行街，见到记者都笑笑口，露晒腰果眼。

伟仔贵为国际级影星，但衣著贯彻低调作风。

Tom Holland同伟仔争影帝。

近年因为疫情肆虐，各行各业都受影响，伟仔自前年起其实都接咗几部戏，包括与刘德华合作的《金手指》、与郭富城合作的《风再起时》、与周迅合作的《无名》等，全部都已经煞科，但似乎都因为疫情影响，仍未安排何时上映，当然宣传都未知几时做。不过都恭喜伟仔先，因为佢刚凭《尚气》在《Critics Choice超级颁奖礼》获「最佳超级英雄片男演员」及「最佳电影奸角」两项提名，与片中儿子刘思慕及「蜘蛛仔」Tom Holland等争「超英」影帝。之前难得在港见到伟仔，记者都有上前问多两句，他均以点头及摇头示意，得知他会留港过年，暂时无需到内地工作，相信大把时间留港休息呀！

呢个蓝色背囊好熟口面！

冇错！个背囊伟仔由2017年已经孭紧。

似老婆有睇靓画瘾

伟仔当日由置地广场行去ifc间苹果专门店，一嚟就搵职员问问题，睇嚟一早已经睇中产品。他企埋一边揿住电话等，由一名女职员拎出产品给他查看，由于他没购物袋，相信是将产品放在背囊，十分环保。之后行往攞车途中，看到有卖画的店铺都入去行个圈，现场的画作售价大约6千至几万不等，果然同老婆刘嘉玲一样，有铺收藏靓画瘾。不过今次伟仔应该睇唔啱嘞，最后都冇收获。

一踏入苹果专门店门口，伟仔已经问职员问题，似乎一早已经睇中要买嘅嘢。

行街有收获！

买完嘢，伟仔将货品摆埋落背囊，十分环保。

伟仔买完心头好，行去画铺睇画。

刘嘉玲都非常锺意收藏靓画，睇嚟伟仔同老婆兴趣相近。

见记者亲民笑笑口

伟仔等升降机时，记者上前问两句，「最近都喺香港？」伟仔都笑住点头，仲摇头示意暂时唔使返内地工作，虽然见唔到个口但从其腰果眼可见笑住答记者，真系又Nice又可爱。去年12月，漫威已经同《尚气》导演Destin Daniel Cretton签咗合约开拍续集，甚至串流平台Disney+都话会制作《尚气》外传剧，记者都好奇伟仔有冇份拍呢？伟仔就回应：「我唔知呀！」最后他搭升降机去攞车，临走仲同记者讲再见，非常亲民。