贵为元祖级师奶杀手，58岁的陶大宇因为在内地登台唱《倒转地球》被指人歌分离，加埋水拨式台风惹来网民嘲笑。不过大宇完全唔介意批评，反令网民激赞够大方。大宇接受本报专访谈及人气再度急升，他感到好开心又称工作多到接唔晒，多谢网民之馀都多谢自己：「谂法同以前唔同，多谢有啲经历改变咗自己。」对于被批评，他笑言所有事都有好坏，每件事都退后啲睇。采访：秦咏姿、杜淑霞 摄影：沈健程 场地提供：The AIR (The ONE)

 

陶大宇这次回港主要想陪伴家人，尤其是年届92岁的母亲，亦都趁机休息返一排，暂时未计划返内地工作。

 

大宇自认后生时好火爆，对于作为演员却因唱歌而翻红感到意外，他表示当初选唱《倒转地球》是想炒热气氛：「唱歌唔同拍戏，好即时㗎，个个地方嘅人性格都唔同，于是我搵方法，希望一出场观众就笑。尽量喺台上动感啲，多啲气氛，令到观众笑，我做完就安乐。」而在台上动作夸张，亦衍生了水拨式台风：「我开头系想打招呼，但有时啲舞台好大，我想照顾埋后面观众，个动作就大啲，点知拨吓拨吓就成为咗水拨式。」

 

陶大宇在内地登台每唱快歌都向观众大动作挥手，被网民称为水拨式台风。（网上影片截图）

 

《倒转地球》咁红，引来好多圈中人拍片模仿，ERROR成员保锜都有份，陶大宇都话几似呀！

 

唱两首歌唔系收20万

坊间流传大宇在内地登台唱两首歌就有20万人民币落袋，他为此澄清：「我会向呢个目标进发，都希望有呢日。《倒转地球》对我的确有好嘅影响，搵我嘅Job多咗好多，但我接唔切、做唔切，就算俾20万一场我都冇本事搵。有啲我都冇覆机，同埋又筛选过，有啲我唔想做。」早前在内地逗留了半年，是他人生首次离港咁耐，虽然唔惯又有啲辛苦，但搵到真银点都值得：「呢半年赚咗7位数，唔完全因为《倒转地球》嘅，我打咗呢份工咁耐，我逐年加都有啦！不过外界咁谂都觉得合理。」而家大宇爆红都冇趁机加价，全因知道疫情下大家都有难处，他说：「疫情下有得做已经好好。」问到会唔会考虑将搵到嘅钱换架名车，大宇竟然话:「其实我16年冇换过车，觉得车系代步啫，揸到揸唔到为止。」

 

翻唱《倒转地球》爆红令大宇工作多到接唔晒，在内地逗留半年，自爆赚咗7位数，近日回港即有节目拍！

 

陶大宇受访期间引来途人围观及要求合照，大宇来者不拒，非常亲民。

 

陶大宇歌喉受制作公司赏识，帮佢出咗首贺年歌。

 

陶大宇出贺年歌，制作公司仲买埋巴士车身广告做势，真系威威呀！

 

唔抗拒演同性恋角色

大宇身为元祖级师奶杀手，对上一次接港剧已是2019年ViuTV的《诡探前传》。原来多年嚟都有唔少剧集搵上门，但都被他拒绝：「太拣择，我成日推，导致冇戏拍，我咪走去唱歌罗！」而接戏除咗角色要适合，拣拍档都要合理，大宇表示：「可能唔系好衬，有啲咁后生，我一把年纪，点做我女朋友呀？我做佢阿爸就差唔多。」喺《大叔的爱》开拍前，一直有传「大叔」第一人选是大宇，「搵我系真嘅，我估佢搵咗唔同嘅制作公司，其中一间搵咗我，问我有冇兴趣，但唔知点解倾咗一两次就冇咗声气，咁呢行倾吓又唔一定要搵你。」亦不是如外界所讲，因角色是同性恋而拒演：「呢套剧我有兴趣，又系人夫、又Hehe哋，如果系《大叔的爱》我OK，唔同《春光乍泄》嗰啲，呢套搞笑好多。」

外界有传大宇唔想拍Hehe剧而拒演港版《大叔的爱》，他为此澄清，并指有特登睇日本版《大叔的爱》了解角色。

 

同欧阳震华都被称为元祖级师奶杀手，不过陶大宇已有12年冇拍TVB剧。

 

陶大宇最后一次拍TVB剧系12年前的《掌上明珠》，他坦言一直有收到邀请，但故事唔够吸引。

 

陶大宇上一套剧已经系2019年ViuTV的《诡探前传》，佢拍剧要慎选拍档好有要求。

 

陶大宇早前玩埋抖音，未来都考虑直播带货。

立即下载 | 全新《星岛头条》APP : https://bit.ly/3yLrgYZ