独家丨声梦Chantel Windy睇好Gigi夺新人奖 Yumi自爆似《青春本我》遭校园欺凌

由《声梦传奇》学员有份担正的青春校园剧《青春本我》刚推出，当中平均年龄只有15岁的Chantel（姚焯菲）、Yumi（锺柔美）、Windy（詹天文），首度做主角既兴奋又紧张，3人中Yumi自爆同角色最相似，同样惨遭校园欺凌。讲到年尾颁奖礼，有份角逐的Chantel，对于夺新人奖只有一半信心，她更加睇好好姊妹炎明熹（Gigi），不过最搞笑是3人都自认好懒，仲未得闲投票。撰文：杜淑霞 协力：秦咏姿 摄影：叶君海、沈健程

Chantel、Yumi和Windy感情好好，除了想单飞，也希望组合「After Class」继续合作。

Chantel、Yumi和Windy都一致睇好好姊妹Gigi有机会在音乐颁奖礼攞奖。

《青春本我》早已预告主角会本色演出，Chantel、Yumi和Windy中以Yumi跟现实最似，她自爆本身亦有经历校园欺凌，不过对事件已放轻松，「呢次个角色系有啲似我，都似我日常学校生活，但系欺凌冇个剧咁爆。冇话好严重，可能话我唱歌好劲之类，未有呢个比赛已经遇到呢啲事，佢哋知我有唱歌同埋喺电视出现，开头我都有啲唔开心，有啲介意，但系呢啲事会遇到愈嚟愈多，每个人都有佢哋自由，所以冇乜所谓。」不过，她强调在学校有朋友陪玩，绝非被孤立。

Yumi认为演跟自己反差大角色够刺激。

剧中Yumi演的「叶敏儿」，在校园饱受欺凌之苦。

难忍笑变NG王

剧中Windy演Asha（张驰豪）胞妹，她坦言完全没违和感，「Asha做我哥哥好似，平时佢同我哋相处都好照顾所有人，同佢做戏会增加好多默契。」而今次演文静角色的Chantel坦言同自己好唔同，被爆忍笑劲差变成「NG王」，「最难系忍笑，笑场我就会NG，每个人都会甩对白，但系我笑场系最多。」她被Yumi和Windy指时时刻刻都会笑，她承认特别见到造型搞笑的Felix（林智乐）时，一定会忍不住爆笑，更创下入行以来NG最多纪录，「真系数唔到，但佢啲对白节奏同埋语气，听几多次都咁容易笑。」

Chantel希望下次有机会尝试拍古装。

Chantel被封「NG王」，因她任何情况都忍唔到笑。

三人都好享受一班人一齐开工，今次演出后更加爱上演戏，未来更想挑战奸角。Windy说：「我想试吓做反派，或者同本身性格相差好远角色，会系一个挑战，会学到多啲新嘢。」Yumi都认同，「试一啲同自己好唔同嘅嘢，完全唔系我嚟，希望可以突破自己。」Chantel就想试演古装望反差更大，「演古装但最好唔好室外拍就OK，因为好热，都想同自己性格差好远，古装就可以有呢个元素，不过台词会好难记。（仲要搣甩英文，唔可以讲OK！）知道。」

Windy最想试奸角，挑战自己。

Windy剧中演Asha胞妹，戏里戏外都被大哥哥照顾。

小题：恨拍锺嘉欣演奸角

讲到期望合作对手，三位小妹妹表现得特别兴奋。Yumi说：「我会拣锺嘉欣前辈（因为话你似佢？）系呀！都好想试吓！」问到是否想对方演她妈咪，Yumi即表现尴尬，Chantel即帮她解围，「演佢嘅年轻版。」提议Chantel拣偶像MC（张天赋）合作，她即露甜笑兼现心心眼仲讲到口窒窒，叫她冷静，她即反驳，「我好冷静，希望唱歌可以合作。」又话最恨其实跟陈凯琳合作，「细个好锺意陈凯琳同埋锺嘉欣，我会印陈凯琳啲相出嚟畀同学睇，好靓呀！（见过真人未？）港姐彩排见到佢，佢排紧就唔想阻住佢，有机会希望可以合照。」而Windy冇特定想合作对象，三人仲搞笑话除了前辈锺嘉欣外，仲想同好锺意唱歌的炎明熹合作。

三人都恨跟前辈锺嘉欣合作。

早前见到偶像MC劲兴奋的Chantel，好期待两人有机会合唱。

今年凭首支单曲《原来谈恋爱是这么一回事》成功打入「叱咜我最喜爱女歌手」十五强的Chantel，对成绩已感满意，「我都冇谂过自己会出歌，其实嚟到呢个地步已经好好，炎明熹都好好，大家要支持炎明熹。（可惜最终炎明熹十强止步）」对于夺新人奖信心，她坦言一半一半，「我唔会完全冇信心，不过就有更加多其他好啲歌手值得攞呢个奖。」问到是否同样睇好Gigi夺奖，「我对佢好有信心。（佢攞开心过自己攞？）如果两个一齐攞仲开心，但系奖项呢样嘢顺其自然，希望愈大失望愈大。」不过她坦言：「我冇投票，冇投过畀人，我太懒，同埋投畀自己好核突。」而Yumi同Windy亦直言未有时间投票，Yumi说：「心灵上系支持佢哋。」Windy说：「我哋喺心入面投晒啲票畀炎明熹。」

Chantel早前凭单曲《原来谈恋爱是这么一回事》成功打入「叱咜我最喜爱女歌手」十五强。

Chantel、Yumi和Windy联同Gigi，早前组成「After Class」推出单曲《要为今日回忆》。