独家丨何依婷首做女一被批评爆喊 怕传绯闻拒同罗天宇食饭

有传27岁「小花」何依婷（Regina）肯卖身TVB 20年，所以入行短短4年就能火速做女一，于新版《十月初五的月光》坐正做女主角君好外，仲做埋年青版孪生姊妹莎华及莎莎，超有发挥！不过，有经典剧集珠玉在前，难免会有比较，何依婷接受本报访问时忍唔住放负爆喊：「我都唔认同自己，我怪责自己…」语毕，眼泪大大滴流落嚟，好惨惨猪呀。采访：方骞平 摄影：叶君海

深入民心 2000年版的《十月初五的月光》好深入民心。

TVB台庆剧《十月初五的月光》成为最近热话，因为21年前的旧作中，张智霖及佘诗曼所演的角色太经典，比较在所难免。网民狠批何依婷演技未到家，声音又吵耳，虽然都有网民帮拖话要畀时间新人磨练演技，但唔够负评厉害，不过从来都话有人闹总好过冇人讲。 

 

再接再厉 去年何依婷性感出席台庆颁奖礼角逐「飞跃进步女艺员」，今年获奖呼声高。

 

知道把声太嘈已调节

对于负评，何依婷一轮嘴回应：「冇法子，作品出街会有人锺意亦会有人唔锺意，呢啲我睇得好淡，有建设性嘅评语会参考。多谢锡我嘅朋友好似陈晓华、黄庭锋、丁子朗，同埋好多fans踊跃留言鼓励我，而何远东赞我一人分饰3角做得好好。其实都会有唔开心，但有啲批评得都啱，好似话我把声太大听到观众好辛苦，谂返起初头拍发脾气场口，每场拍完都好耷，足足食咗几包喉糖，拍咗几日同导演讲觉得太嘈要调节，所以之后有改良版，我哋keep住拍几日就睇一次片改善。」
 

投入演戏 于《陀枪师姐2021》拍撞车身亡戏，何依婷表演获赞好。

 

担正主角 胡鸿钧及何依婷喺新版中分别饰演男女主角初哥哥及君好。

对「考牌作」问心无愧

问到点睇「考牌作」?她笑住兜圈：「我畀唔到分自己，其实观众只系睇到萤幕上嘅何依婷，实际上何依婷点捱更抵夜，日晒雨淋，返到屋企冇得瞓坚持睇剧本，所以我对自己嘅评价系问心无愧，经已尽咗最大努力。」她再讲出「大道理」为自己打气：「感恩有一半人都话几好呀，可以睇落去，人生唔可能永远一帆风顺，当去到咁嘅位置就要承受相应嘅压力，唔可以要求全世界爱你，今次系上咗handle压力嘅好好一课。」

 

上位唔快 何依婷话入行4年有成长经历，唔算好快做女一。

唔想惹绯闻抹杀努力

Regina讲到眼湿湿，透露自己系好情绪化嘅人，亦有为报道喊过，同时又唔想人哋知佢唔开心，压力位来自怕令人失望，讲讲吓终于忍唔住喊出嚟，「唔需要大家同情我，我内心好坚强，抹乾眼泪就冇嘢…」她冷静下来紧张地叫记者唔好写佢锺意喊：「我觉得好瘀，都唔系第一次咁喊，我唔锺意喊嘅形象。觉得自己做得唔好所以唔开心，连我都唔认同自己，因为对自己有要求，会倾向怪责自己。」另外，她又自爆怕惹绯闻，主动同罗天宇提出要避忌吓，唔好一齐食饭，最怕畀人误会抹杀咗大家嘅努力，对两个人都唔公平。 

放负爆喊 何依婷对自己有要求，对负评喊完又笑。

过度吵耳 剧中何依婷因为把声太嘈被网民投诉。

保持距离 何依婷好怕惹绯闻，主动同罗天宇提出要保持距离。