独家丨J.Arie笑言演唱会好激父母必黑面 全裸海报被弹冇样冇身材

七仙羽（七师傅）喺ViuTV节目《七救星》中安排过J.Arie(雷深如)体验瞓街滋味及去半山区吸灵气断穷根，之后J.Arie果然大翻身，做完伍仲衡演唱会嘉宾后获主办单位邀她开show。等咗8年终于开到首个售票演唱会，她扬言要玩爆佢！可惜古老板话拍戏嚟唔到，但有拍片去鼓励她。采访：方骞平 摄影：叶君海 发型：Bowie Lo @ AdmiX Styling 化妆：Jessica Chan 场地：贰叁书房Jisaam.books

J.Arie将于本周五假海洋公园怡庆坊举行《PERFECTLY GUILTY LIVE》，今次演唱会主题系Perfectly Guilty(有罪恶的人)，要赤裸呈现自己唔系善良嘅人，所以坚持用全裸概念影演唱会海报：「影相当日我只系贴乳贴，下身着咗条裸色T-back仔，在场有男工作人员，其实全身差唔多系睇到晒，但都唔理豁咗出去，人生点都要试一次。哈！真系可以收山。」

阿妈好担心出Show唔着衫
虽然J.Arie咁尽地一煲，但有网民唔多欣赏，弹佢丑样冇身材冇兴趣睇！J.Arie笑说：「咁都够胆死？系呀！要以身作则将歪理衰嘢呈现嘛！亦希望大家坦然面对自己系乜人。父母好担心，阿妈多次追问『演唱会度着衫㗎嘛？』真系好好笑，着衫定义系乜先？」自认系激死父母系列嘅J.Arie事先张扬个唱内容会好激，唔知父母顶唔顶得住，肯定会喺台下黑面。