独家丨《造星IV》马欣获师兄 Frankie力撑 27岁参加唔怕迟

《全民造星IV》40强刚诞生，有得留低的78号马欣（马彩欣），初次登场大跳Jazz令人印象难忘，不论评判、导师及观众都相当受落，更赞她性感得嚟又唔Cheap，马欣亦好意外女观众一样接受她。以27岁之龄选女团的马欣自言唔怕迟，因有MIRROR最年长成员，33岁的Frankie力撑，令她信心大增，更无惧公开恋情。撰文：杜杜、秦咏姿  摄影：叶君海、谭壹致

第一轮比赛大跳性感舞蹈的马欣，坦承没想过女观众反应正面，「唔系Sexy一定系色情，我今次表演有两个目的，第一系想大家认识我，第二就系想畀大家见到我呢种舞种，跳出嚟系一种艺术，而家出嚟嘅反应系开心，无论男、女观众都好锺意同欣赏呢个Style。之前都预咗男仔会锺意，但会谂女仔会唔会唔锺意呢？而家唔单止锺意，仲有好多女仔问系咪可以上我堂。」不过讲到性感演出，马欣就要考虑，「要视乎尺度，我本身想表达嗰样嘢唔系想Show性感，所以唔会挑战太色情嘢，譬如着三点式或者牀戏咁，呢啲尺度我系唔OK嘅，就算好艺术性质都要再考虑。」


为偶像Twins伴舞
18岁误打误撞入行做Dancer的马欣，因为呢个经验促使她参加比赛，「以前从来冇谂过会参加，今次动机就好似以前跳舞唔小心入咗行，跟住好锺意，都系用呢股冲劲去报名。」做了8年Dancer，曾为黎明、谭咏麟、C All Star等伴舞的她，最开心是梦想成真跟偶像Twins合作，「细个好锺意Twins，佢哋第一个MV打侧手翻，我嗰时住村屋出面有个沙滩，我就喺沙滩系咁打学识咗侧手翻，点知大个咗去佢哋演唱会casting中咗，喺佢哋演唱会有机会打侧手翻，成件事好奇妙。」

想向演员发展
对于27岁才参加《造星IV》加入女团，马欣唔觉得迟，「所有嘢都唔怕迟，咩年纪想做就试咗先，一定会有啲嘢拎得走。」而参赛她还有其他目标，「如果可以打破呢个年纪入到女团梗系好，但我都想有其他方面发展，我对演戏都有啲兴趣，都想睇吓有冇机会喺呢方面发展。」马欣决定参赛原来受师兄、MIRROR成员Frankie影响，「佢同我同一个Studio学跳舞，佢早我几届，嗰时佢已经好照顾我，教咗我好多嘢，今次《造星》佢都畀咗好多意见，佢叫我keep住自己心理质素，喺社交平台度讲嘢宣传自己多啲，仲教咗我一啲小技巧。（佢系年纪最大成员，都畀到啲勇气你？）都系㗎！就系冇嘢系冇可能，咁咪试吓罗！」


男友买糖水支持
观众缘不俗的马欣，由最初参赛时IG follower只有6千急升至两万1千，而且男女粉丝比例平均，她都开心暂时未算有太多负评，「除咗有人话我似黄心颖、黄心美同林嘉欣之外，都有人话我似宾妹，哈哈！我觉得OK，我由细到大皮肤都唔白，惯咗畀人话我似泰国、越南同马来西亚人，嗰边啲人都几靓，所以我都唔觉得系踩，希望可以Keep住冇乜负评啦！」马欣更大方公开已有舞蹈员男友，「身边朋友都支持，所以佢都好支持。（有冇畀意见？）本身我哋意见已经好多，除非我真系好烦会搵佢帮手，但暂时都冇。如果好攰，佢咪买个糖水畀我食，哈哈！我觉得够㗎嘞！食吓嘢减吓压，因为佢知道我锺意食嘢。」