独家丨黄翊讲明劲飙高音晒歌艺 唔避忌搵蒋嘉莹做个唱嘉宾

54岁的黄翊将于11月27日假麦花臣场馆举行《最爱的你2.0》演唱会，之前因为同经理人蒋嘉莹坐喺公园倾公事，一度惹嚟「嗒人妻」小风波，好彩谣言止于智者，两人强调行得正、企得正，日后也毋须避忌，所以蒋嘉莹仍然是个唱嘉宾之一。问到会否搵埋传过绯闻嘅康子妮现身？黄翊却避忌说：「Rundown冇呢个安排。」采访：方骞平 摄影：沈健程

3年前，黄翊的《最爱的你》演唱会反应唔错，原先想乘胜追击，只可惜受疫情影响，演出无期，不过经已有齐Rundown放喺个脑度备用，直至月前做完罗敏庄个唱嘉宾获主办单位邀请开show，因而火速成事。

乐坛百花齐放先好玩

除咗唱歌跳舞，今次黄翊会挑战高难度，拣选张信哲、萧煌奇嘅劲飙高音歌嚟唱：「自己唱高音都比较稳阵同有层次，希望可以晒吓歌艺。好多人成日讲唔知新一代唱乜，搞到再冇兴趣听歌，我反而觉得唔同时代兴唔同嘅嘢，大家要放开胸襟去进入佢哋嘅世界，听吓佢哋表达乜嘢，大家各师各法冇话好唔好，系要百花齐放。而我系声乐班底出身锺意挑战难度，要唱到青筋现晒先过瘾。」对于喉咙有个水囊，他表示唔会影响到唱歌，但医生叮嘱他要放松自己，好好休息！另外，到时太太陈存正及儿子都会捧场，笑言喺阿仔面前威吓。问到会否请埋康子妮做嘉宾，合唱同时澄清吓绯闻？黄翊即耍手拧头：「唔会喇！传闻又唔系事实，而且所有嘉宾都定晒落嚟。」