胡定欣遭陈山聪囝囝冷待 出动洗脑歌「Jaco Shark」仍然零反应

胡定欣日前为陈山聪太太Apple庆祝生日，原来当晚仲有一件小插曲。山聪噚日（20日）喺IG上载一段约1分钟长嘅短片，见定欣好落力氹山聪囝囝Jaco开心，抱住对方，情深款款献唱系小朋友都锺意嘅洗脑歌《Baby Shark》改编版，「Jaco Shark do do do,Jaco Shark do do do...」但Jaco完全冇畀反应，只系低下头，之后定欣再出击，教唱生日歌畀妈咪听，Jaco个样似乎愈来愈惊。最后定欣都忍唔住，用好温柔嘅语气问Jaco小朋友：「你可唔可以话畀大家知，点解你会咁对我，你爱我嘅系咪，你爱过我嘅，kiss kiss，亲亲。」唔讲都任你抱，讲完Jaco就伸手兼嗌「妈咪」话要走。

山聪就有另一番解说：「大佬从来只会对住一个人咁深情，我真系好想知你哋前世系咩关系，点解今世会系咁 @nwuuu @jaco_chan_aj #情深说话未曾讲 #相爱很难 #前世 #大佬嘅眼神 #依段戏做足功课 #jaco #爱的表现 #胡小姐乜又系你呀。」被冷待嘅定欣死撑到底：「因为冇其他人好似我咁对佢！你，好自为之！」好姊妹姚子羚忍唔住留言：「Jaco话呢位阿婵你唱完未呀！」，陈敏之亦话：「Jaco心谂补返D唇膏嚟见我。」十分搞笑。