独家│廖子妤被林家栋掟落地险爆头 两年冇返大马见西刀鱼蛋爆喊

廖子妤（Fish）由马来西亚来港发展近十年，演出嘅角色好多元化，最新在《智齿》中饰演断掌嘅毒品拆家「可乐」。电影于17年已煞科，但Fish仲好记得拍摄过程，因为真系好辛苦，讲到「可乐」，Fish表示绝对系佢从影以来最多动作戏的角色。采访：秦咏姿 摄影：谭壹致 服装：Louis Vuitton 发型：ZapTang@ Toni & Guy 化妆：King Yip @KingsMakeup

因为好恨拍到郑保瑞导演的电影，Fish呃导演有做开运动，之后临急抱佛脚练体能，所以拍得好辛苦。另外，她跟影帝林家栋最多对手戏，有场戏要俾男方掟落地，彩排时好顺利，但最后竟然发生意外：「我有少少走错位，家栋哥捉我个位唔同咗，掟唔中张垫，我个头就撞向地板，好晕，我即刻捉住呢种好惊嘅感觉，导演话OK。家栋哥好紧张捉住我问『有冇事』，佢同我讲『你做得好好』，我即刻觉得个人好滚，好热血。」

搵唔够钱压力好大

《智齿》于香港多个旧区取景，廖子妤都话场景令佢好入戏。在香港生活近十年，Fish已拎香港身份证，坦言觉得香港反差好大：「由中环去深水埗其实好近，但已经唔同面貌，呢个反差喺咁细嘅地方都可以并存，系香港令我着迷嘅地方。」Fish细个睇港剧以为香港啲屋好大，嚟到香港先发现，唔系人人住大屋，「我都觉得住得好窄，个人好唔舒服，人系需要空间，而呢样嘢喺香港就系最贵。」

疫情持续近两年，Fish收入大受影响，最近先多番啲工作：「好慌，之前仲使紧2017年赚嘅钱，又要租屋、养猫、畀钱家人，好大压力。」不过最惨系两年冇返马来西亚：「好挂住，思乡嘅情绪呢两年达到高峰，个感觉好差，差到有日我去超市喺个雪柜面前见到个包装写『马来西亚西刀鱼蛋』，跟住我就爆喊。」虽然好想返马来西亚，但来回都要隔离，会少咗时间搵钱，所以惟有希望疫情快啲完。