独家丨邓建明自队一支红酒好识叹 同老婆食意菜撑枱脚

有冇人一见到邓建明(Joey)，耳边就即刻响起佢唱《Chill Club》嘅歌声?仲有两年就60岁，因为负责ViuTV《Chill Club》嘅现场伴奏结他手及音乐总监，成日要出镜加上经常同年青人接触，所以Joey Tang Keep得好好，冇肚腩条腰又直，有型㗎。日前佢同老婆食意式Dinner撑枱脚，叹住红酒食足近两个钟，老夫老妻冇拖手平排行，两公婆都好鬼Fit。采访:谭壹致

本周日(7日)就系Joey嘅58岁牛一，佢冇IG，FB又唔常更新，唔知佢点庆祝，但一定离唔开饮酒，事关佢好锺意饮亦好饮得，之前《头条娱乐》都影过佢去超市买红酒，唔好觉得超市买酒好cheap呀，而家大间嘅超市都有好多靓酒㗎。

老夫老妻冇拖手
当日傍晚，Joey同老婆喺又一城一间意式餐厅食晚餐，两人拣选最入位置坐低，Joey先点酒，老婆再点食物，红酒到，Joey边饮边讲电话，观乎添酒频密度，一支红酒佢饮咗起码7成。食近尾声，嘢食清晒，Joey再慢慢叹埋啲酒，其间有一班人刚到坐佢附近，可能有啲嘈，Joey即叫侍应要求调位，饮多一阵就埋单走人，虽然两个钟唔够差唔多Ko咗一支酒，但Joey冇异样。离开后，两公婆冇拖手但拍住行，睇Joey嘅侧身，冇肚腩，正宗Fit佬。