夏韶声口密拒透露个唱细节 Joey称观众超近距离接触舞台

夏韶声和邓建明（Joey）将于下月13日在九展举行《Arrival ♾ Departure》演唱会，二人近日频频秘密练兵，为保持个唱神秘感，由海报拍摄、练歌、制作会议时，他们都谢绝非「核心成员」参与。夏韶声笑指多年未举行演唱会，一直深居简出，鲜有以「靓佬」造型示人：「几耐未试过Set呢啲咁劲嘅发型，真系啲佬味出晒嚟！其实呢个骚系『概念音乐会』，视觉、听觉都要有不一样嘅感觉，我地要集中精神做准备，所以唔俾宣传团队参加彩排，怕佢哋爆晒出嚟冇神秘感。」

另一主角Joey就话准备得「七七八八」，与「阿公」同台感兴奋：「佢同我嘅关系唔需要再多讲，我可以同呢位前辈合作，真系兴奋到瞓唔著！佢不时会有新嘅Idea，每次开会都会觉得好正，咁要辛苦导演、监制，不时帮我哋改Rundown、改舞台，所以我话准备得『七七八八』系因为随时可以上台唱，但其实Rundown可能次次开会都变紧。」虽然夏韶声口密拒透露个唱细节，不过Joey就自爆舞台「秘密」：「今次演唱会舞台系好特别，观众抬头都望到星空嘅感觉，Star Hall 有史以来都未做过咁嘅效果，现场所有观众都系超近距离接触个舞台，仲会有好特别嘅lighting 同laser，配合番『Arrival Departure』 超现实主题。」

Joey早前与太极队友雷有辉第一次街头Busking，二人作为「Busking界」初哥，感到无形的压力：「其实Busking就当系练歌，顺便畀人知道呢个骚当宣传罗！但系Busking真系有压力，音响、结他都要自己Setup，后来大家知道系我同阿Pat唱紧，慢慢围埋嚟睇，呢啲现场感仲正过红馆。」