张伟文永不放弃精神获观众撑场 文化中心首场个唱宣告爆满

68岁死过翻生嘅张伟文（Donald）近年不良于行要靠坐轮椅代步，喺疫情下停咗两年冇开个唱坦言好唔开心，幸而近期喺有情有义嘅老友方俊（Aman）悉心照顾下，翻肥100磅，状态回勇，因而喺今年12月20日、明年1月12日及14日分别喺香港文化中心、沙田大会堂及元朗剧院再开骚举行《友情有义演唱会》。Donald逆境求生，永不放弃故事得到好多观众支持，经理人Aman宣布好消息，指张伟文首场文化Show经已爆满，沙田大会堂及元朗剧院场亦开始出现扑飞潮。

直播热身相当精灵
由于Donald两年冇开Show，Aman之前安排他做网上直播嚟热身，当晚拣唱已故音乐大师黄沾作品，当Donald开腔演绎《风云》、《亲情》时，获网民大赞唱功依然了得，畀心心及like力撑，为他打气，虽然因为企唔稳曾经撞到脑出血影响到脑退化，但有歌唱，当晚Donald变得相当精灵，见网友叫他加油，他仲识讲笑话回应：「我已经有好多油唱，唱歌系我最开心嘅一件事！」对于被赞他宝刀未老，Donald亦即反驳道：「老咪省吓把刀罗！」当晚Donald跟Aman及发烧女歌手方文(Astor)唱足两粒钟，Donald未见疲态，愈唱愈开心，而Aman演绎吕方《普通人》都带出惊喜，网民留言话正，相当好听。