独家丨邓健泓只求老婆才华得到认同 耗尽六位数积蓄为石咏莉出歌

石咏莉(Sukie S)离开咗星娱乐后沉淀咗一年，今年以独立歌手身份再闯乐坛，先后推出原创广东歌《100岁备忘录》、《期间限定》及啱啱派台新歌《Rainy Day咏莉日》。Sukie S感激老公邓健泓(Patrick)出钱又出力，投资6位数字让她出歌，Patrick就话最紧要Sukie S嘅才华畀人见到换嚟掌声，令她开心兼自豪！采访：方骞平 摄影：梁志明 场地：Da Filippo Trattoria @ Harbour City

相隔《期间限定》只系3个月时间，最近Sukie S再出新歌《Rainy Day咏莉日》。不过，作为幕后「老板」嘅邓健泓承认喺冇backup下系几大负担，𠵱家要开始计数：「因为我哋冇乜资产，所以有谂过《Rainy Day咏莉日》唔派台，但呢首歌喺年头时同《100岁备忘录》一齐做，做起咗又唔好嘥，同埋年头承诺过会做3首原创歌。因此要喺有限嘅资源下拍MV，最后邀请咗33位『天使』用木颜色笔画上图画，再将图画凑拼做成MV。」

做音乐预咗赚唔到钱

Patrick自爆2014年为咗帮Sukie S出唱片，要变卖一部车，加埋血汗积蓄嚟做资本，但当年赚到钱，相反𠵱家做音乐预咗赚唔到钱，但满足感系一世嘅，较投资买个名牌袋更好，而且最重要系令老婆开心：「可能你哋听落会好呕，我眼中嘅Sukie S其实条件好好，明明声音好又系高质素嘅女仔，点解会冇人听到佢歌声？我想佢啲歌畀人听到，等佢唔好觉得自己冇用！」在旁的Sukie S承认「老板」一直锡她：「去到咁上下岁数唔系求上一线位置，最重要系enjoy人生！」