独家丨罗仲谦笑囡囡似戏子最叻扮喊 拍《仁医》见病童感受深

罗子溢（前名罗仲谦）2016年跟杨茜尧（前名杨怡）结婚后，去年首任爸爸，育有囡囡翊心（Hera），他当爸爸后即拍剧集《星空下的仁医》演儿科医生，对住小朋友便父爱泛滥，见到病童唔使入戏标眼泪。他承认Hera出世后转变极大，连最强Body都保唔住，但又想keep住型样唔想将来失礼囡囡，他又爆笑透露囡囡可能遗传演员父母优良因子，天生戏子演技极佳，更似足妈咪杨怡最叻就是做喊戏。撰文：杜杜 摄影：沈健程 形象：Cheryl Yam 发型：Jan Chiu@IL Colpo 化妆：Jennifer@Annie G Chan 服装:Billionaire Boys Club、Homme Plissé Issey Miyake 场地：W Hotel

子溢继《On Call 36小时》在《仁医》再扮医生，但今次角色「文柏熙」复杂得多，背负龚慈恩演的名医妈妈期望外，更要守住患有精神病秘密，作为医生却讳疾忌医。他开心制作人对自己演技有信心，「《陀枪师姐2021》时已有人话我演戏沉实咗，层次丰富咗，可能做咗爸爸睇件事唔会咁简单，眼神唔再系咁单纯，好似以前咁冇经历过啲乜嘢，会多咗少少岁月磨练。」


为凑女放弃好身材

今次对住小演员演戏，子溢做老窦后的转变更明显，「同BB做戏，讲个BB有重病插晒喉，望落好可怜好惨，我小朋友又同佢差唔多岁数，睇住个小朋友都谂起个女，感情好丰富，望落去眼泪都标出嚟，唔需要培养啲感情已经出。」不过他亦承认这次拍摄最困难就要配合这些「尊贵的演员」，「有场讲个BB好似feel到医生嘅爱心，想表达佢谢意用手仔掂吓你，我讲呢度10秒钟，但呢场戏我哋拍咗几日，因为小朋友每日个状态都唔一定好好，大家唯有等，佢嚟到不停喊拍唔到就要取消，系最尊贵嘅演员，好睇情绪，冇mood唔拍，哈哈！」


由于囡囡Hera正值疫情最严峻时出世，加上子溢要为《仁医》开工，他坦言那段日子压力特别大，会为Hera想得特别远，「做咗爹哋思想真系冇以前咁单纯，系会复杂咗，谂多咗好多，好似杀到埋嚟要拍多几套搵多啲钱，要有勇气啲踏出个舒适圈，为个女变得有计划咗。尤其系佢嗰辈喺社会，竞争上应该会更加激烈，应该搵食更加辛苦，你又唔知佢叻唔叻喎！唔叻嘅话死火啦！虽然我个女都有啲姿色，哈哈！唯有自己努力啲，我成日会谂搵埋佢嗰份，我做佢后盾，咁就最好。」


挂住凑女，子溢更「荒废」了最强Body成年，「健身都冇做，我最爱嘅嘢，其实有时间，不过凑完佢觉得攰唔去，我都紧张外形，因为我希望阿女大个咗，我仲系咁样嘅状态，去接佢放学时，佢唔会觉得『哎吔老窦你唔好嚟接我啦，好核突』，啲同学会话『你爸爸好有型』，会好有自豪感。」

积极造人追多个B

现在Hera已1岁半大，识得有更多互动，更爆笑会不时大晒好演技，「佢硬颈又薄皮唔锺意人话，又好戏喎！两个演员生出嚟，果然系戏子！哈哈！喊戏同佢阿妈一样咁劲呀！但你feel都有啲假喎老友！（佢几时用呢招？）佢唔想食嗰样嘢，但系妈咪又想佢食，大声少少佢就即刻喊，但系佢喊紧嘅时候对眼又射吓你，望吓外婆，跟住佢再求妈妈唔食，真系好好戏。」


目前子溢主力带Hera户外活动，茜尧就负责讲故事，最希望囡囡返学后，他们不会变成怪兽家长，「我有一样坚持，唔好咁细个畀佢学啲学术性嘅嘢，譬如学几种语言嗰啲，除非佢自己有兴趣，我唔想将我兴趣加诸佢身上，因为冇兴趣唔会有成绩，自己有经历过，嗰时屋企人话要拣理科多出路，回想番我系锺意文科。」他更谂埋将来面对囡囡男朋友，「唔抗拒佢拍拖识男仔，呢啲避免唔到，你又唔系廿四小时喺佢身边，反而令到佢话畀你知，咁嘅方法仲安全。」


由于Hera太万千宠爱，子溢跟茜尧想生多个令她学识同人相处，所以正「努力造人」，「我哋开放态度，咁先会成功，以前啲人讲咩拣时间，咩中药调理，冇样实现到，唯一实现到系当你放弃嘅时候就会有，命运嚟，唔刻意搞，顺其自然，有mood行埋，冇mood算数，唔使特别勤力嘅。」至于仔女无所谓，因他几享受做外父，「生仔等如冇咗个仔，自己都做仔，问心你几何会返屋企，但系女唔同好黐家，成日挂住屋企，女婿听话啲定系仔听话啲！？哈哈！仔就驳咀，女婿就恭恭敬敬，自己都做人女婿。」