独家丨直击何超盈𠱁2岁女买嘢 快镜式Shopping睇啱即扫

2018年，已故赌王何鸿燊的四房长女何超盈跟年轻7岁、来自哈尔滨的哈佛大学高材生辛奇隆订婚，翌年8月剖腹诞下八磅囡囡辛千觅（Audrey Rose 「荷包蛋」）。话咁快「荷包蛋」已经两岁，小妹妹好得意好活泼仲好有自己主见，点解咁讲?日前下午，31岁何超盈同囡囡、两个本地及外籍保姆一个菲佣加一个保镳去利园Shopping，翻肥年轻阿妈力𠱁囡囡买嘢，当中包括鞋仔及公仔，「呢啲都好靓吖，BB。」但两岁「荷包蛋」冇兴趣，仲将鞋仔放落地示意NONO，一心只想行嚟行去同周围摸吓嘢，好有性格。采访:梁志明

当日，六人购物组现身铜锣湾利园一间童装店，戴住白色Cap帽，着住虾肉色长外套，头发有啲乾乾哋嘅超盈系咁拣童装，唔同深浅嘅粉色及灰色卫衣仔，仲有裤仔，可能做紧半价至七折嘅关系，超盈摩打手系咁拣，见佢冇睇价钱几分钟就拣咗一大堆，仲要唔使试，完全系快镜式Shopping睇啱即扫。

超盈拣咩囡囡都唔Like
阿妈拣衫期间，保镳就陪住戴咗透明面罩，全身名牌嘅「荷包蛋」拣鞋仔，然后阿妈加入𠱁女，拎起唔同鞋仔，包括花花布鞋同囡囡讲，「呢啲都好靓吖，BB。」但囡囡冇兴趣，一嘢丢落地，然后仲愈行愈远，行到出铺头外。之后超盈同囡囡转去睇玩具精品，阿妈又拎起公主餐具同独角兽公仔又英文又广东话咁Sell囡囡，但后者又系冇兴趣，反而拎起啲遮系咁笃落地，好似睇紧《坏蛋奖门人》咁，都几好笑。

万千宠爱的「荷包蛋」
最后超盈买咗只大Miffy公仔，一张咭同一樽粉红色闪粉Gel，再转场去婴儿用品店，不过佢一入铺已经去收银畀钱，睇嚟之前订咗货当日去拎。超盈买咗好多嘢，由保镳拎住，等七人车期间，戴咗副超嘅囡囡由菲佣抱住，超盈就系咁用大公仔去撩囡囡，可能因为身形同之前好唔同，冇乜人留意到超盈，等咗几分钟有车，保姆安顿超盈及囡囡上车后先上车。