独家丨47岁陈炜享受初恋式拍拖 被捉实过马路 甜帮男友拍走头皮

下个月，陈炜(炜哥)就48岁，月前传出炜哥同拍拖两年半的医生男友陈国强（Aldous）在家中低调签纸结婚，仲话炜哥赶生仔所以闪嫁，报道见街后炜哥回应传媒八个字「唔系事实，专心工作。」日前周日下午，专心工作之馀亦好专心拍拖的炜哥同男友去大坑医肚，等位其间，可能见到穿深色外套嘅男友膊头有啲头皮，炜哥温柔地拍咗几嘢男友膊头，动作好简单但感觉好有爱好温馨。而过条短马路，阿男友都会捉实炜哥，好有初恋Feel。采访:张咏森

回一回带先，炜哥于08年同台湾商人颜志行结婚息影，最后分开，12年返港复出拍剧，前年多得老友黄智贤介绍认识医生陈国强，拍拖两年同居，近年屡传好事近。年初两人去跑马地睇新楼盘，之后就传出陈炜秘密再婚，行礼地点喺屋企总之非常低调，不过炜哥否认仲话冇呢个打算。

食唔到猪扒食滑蛋
日前下午2点半，陈国强揸住青色宝马载炜哥去大坑搵食，两人本打算帮衬大坑猪扒名店炳记，但因为周日关系，多人咪去第二度罗。两人过马路去搵其他食店，条马路行几步就完，但陈国强都好紧张咁捉实炜哥手臂，睇呢啲小动作已知炜哥冇拣错人。路过一间茶餐厅，该处滑蛋饭亦非常出名，见唔太多人，就呢度啦。

等位其间好多嘢讲
等位其间，呢对情侣都几好倾，炜哥发现男友膊头有头皮，深色衫有头皮都几碍眼，炜哥好识做地帮男友拍走佢。一个捉实过马路，一个帮手拍头皮，影足成程嘅摄记都表示两人「几Sweet㗎。」等咗几分钟就有位，两人打对面坐，食咗20分钟，由男友埋单离开。