独家丨黄建东有种返娘家感觉 首度担正舞台剧男主角
2021-10-05 23:15 
大家对黄建东认识可能始于2011年《香港先生》，其实当时获得「演艺潜能大奖」的他，参赛前是「香港话剧团」驻团演员，更是纽约州立大学佛东尼亚分校戏剧学士，演舞台剧绝对是强项，最近他终于有机会一展所长，得到导演张之珏赏识，担任舞台剧《我老公你好闷呀》男主角，加上又有新剧《把关者们》推出，仲拍住黄妈妈搵真银，阿东梗开心啦！撰文：杜杜
阿东加入TVB后已久未演出舞台剧，直到两年前跟谢君豪合演过《但愿人长久》，今次再演他坦言好亲切，「有种返到娘家感觉，似回归返自己嘅根，但今次被委以重任，加上个剧本系百老汇名剧，系好大压力。」有今次机会他要感激张之珏提携，「两年喺《但愿人长久》合作完，虽然当时我只有两场戏，但佢都好欣赏我，今次畀咗个主角机会我，我知最初有其他男演员人选，但最尾佢都拣咗我，真系好感恩，亦都系一个好大挑战，自己未做过主角要记咁多对白同场口，又要度个角色嘅起承转合，另外因要同A、B cast两个女主角合作，排戏时间Double咗，但都系好好挑战嚟。」
开心妈咪搵到满足感
除了忙于为舞台剧排练，阿东亦要为新剧《把关者们》宣传，他谓拍摄时虽然初次跟袁伟豪、陈家乐和C君等合作，但大家都是搞笑底，每日开工气氛都轻松愉快，而今次他亦有机会在剧集中作新尝试，「今次我要揸车同打篮球，但我10年前考到车牌后都冇揸过，系个雪藏牌嚟，所以开拍前我搵师傅补钟，去到现场就袁伟豪傍住我揸，多谢佢嘅照顾。至于篮球，我中二之后都冇打过，多谢本身打开港队嘅朋友帮我操练番，开心今次有新嘅挑战机会。」忙自己工作外，阿东妈咪黄叶慧茵都好受客顾欢迎，两母子经常拍住搵真银，阿东特别开心，「虽然妈咪出骚我仲忙，因为佢完全唔识呢行嘅嘢，我要帮佢打点晒，由化妆、整头、拣衫衬首饰都要帮手，但妈咪最初肯抛头露面出镜都系为咗撑我，我系好感动，所以辛苦啲都冇所谓，况且妈咪结咗婚后生咗我同细佬，放弃咗自己梦想，而家佢演出搵到满足感，我都好戥佢开心。」
最新回应