独家丨岑乐怡约友食Tea系咁笑 靠《帮紧你》吸纳好多Fans

ViuTV出咗好多好高质嘅主持，随意一数就有强尼、练美娟、陈安立、Kathy仔(王颂茵)及阿妹(岑乐怡)等等，特别系后者，好多瓣数，例如灵异节目《总有一瓣喺左近》同埋反应超好嘅《帮紧你应援团》。好推崇环保嘅佢仲开咗个「岑乐怡和你Green」Youtube 频道，分享环保资讯添。日前下午，冇乜化妆，着住Tee及短裤，真系好隔离屋「阿妹」Feel嘅阿妹约咗女友人食Tea，两位妹猪边食边笑，阿妹笑到劲多表情，就快30岁，都仲好可爱。采访:谭壹致

ViuTV之前嘅《帮紧你应援团》中最有印象系阿妹同MIRROR嘅Tiger主持嘅「大树好遮荫」，内容就系委托人阿妹，希望给「大树下善待动物庇护站」应援，佢同Tiger出动为无家毛孩筹款，应援相当成功， 除咗义工感动到喊，主持阿妹都一样，呢啲节目好有意义，真系不妨做多啲。

倾到完全停唔到
虽然阿妹帮ViuTV主持咗好多节目，但讲到入屋一定系《帮紧你应援团》，反应好之馀又多咗人支持自己，下个月30岁生日嘅佢应该好开心，所以难怪佢约女友人食Tea都可以食到全程系咁笑。当日下昼两点，着得好casual嘅阿妹同女友现身又一城，两人各自叫咗件Cake加杯饮品，全程系咁讲英文，听唔到两人讲咩，只知阿妹好兴奋，倾到郁晒手，仲系咁笑，表情超多，时而擘大口时而「依起棚牙」，偶然穿插怪表情，笑足个几钟先埋单离开，两人行住街甚至等的士都倾唔完，阿妹都几倾得喎。