独家丨J.Arie拍全裸专辑封套后收山 尽地一煲 律师穷歌手誓减20磅

做创作歌手难，做独立创作歌手更是是攞苦嚟辛，J.Arie（雷深如）早前在《七救星》都讲过，穷到试过银行得番82蚊，原来她入行以来一直瞒住父母死顶，她承认反叛，父母批评创作歌曲《阴阳道具》好cheap亦好少理，不过父母近期见她好坚持，终体谅她唔系玩玩吓冇再叫她退出。而最近推出新歌《判官之印》的她，愈玩愈激，MV大玩虐杀，捱到年底打算再推出新歌加专辑，更努力望减足20磅挑战莫文蔚全裸拍封套，但完成后竟话有意收山。撰文：杜杜 摄影：沈健程  发型：Bowie Lo  化妆：Jessica Chan 场地：The AIR (The ONE)

J.Arie今次《判官之印》大讲虚伪，创作灵感源于《阴阳道具》推出后外界反应，因以性为题材即时被道德审判，连父母也批评她，更未能在电视台播出，令她有很多反思，「《阴阳道具》超过九成都系正评，但都有反应令我反思虚伪，有啲长辈好似我爹哋妈咪会话『你做啲嘢好cheap』，我妈咪睇完个MV话『点解要拍啲咁核突嘅嘢』，点解将性好公开讲就系核突，2021年依然有啲人咁嘅comment，所有电视台都派唔到上去，呢啲原因令我想写首歌回应，叫《判官之印》，因为大家都好似判官上身，都系伪善嘅人，你判人人判你。」


MV大玩虐杀

继上次《阴阳道具》MV搵来虾头和强尼大玩3P后，J.Arie今次MV继续原用虾头，但强尼因太忙会以另一方式参与，她仲邀请一班好姐妹帮手演出，「上次玩3P，今次玩虐杀，我哋会虐杀个男主角，因为佢系虚伪嘅人，表面系一个对虾头好好嘅老公，实则有好多条女，我搵咗靓妹（李绮雯）、Ranee宝宝（李蔓莹）、HotCha嘅Crystal（张纹嘉）、『ViuTV一姐』Hailey（陈俞希）帮手。」她预计MV有机会不能在电视台播出，「次次都预咗剪个洁净版，但上次有少少无奈，唔知啲台把尺放喺边，或者佢哋先入为主，知道首歌系讲sexy一定系䶢，所以上唔到去唱，呢首歌希望唔好啦！」

年底再推出另一新歌后，J.Arie打算集合独立发展后4首作品推出专辑，现在她已积极操fit减了8磅，望能成功搣甩20磅肥肉后，拍摄类似莫文蔚96年《全身莫文蔚》的全裸封套，「虽然冇人想睇，但我想试吓做咗先，横掂都系尽地一煲，激死阿妈系列，我每只歌都激死佢。（有冇莫文蔚咁fit有靓股？）呢啲系咪要做机？做嗰啲蜜桃臀，不过唔紧要而家有P图嘛！不过，除咗裸露，仲要谂个实质嘅概念去包住成件事。」


感激家人体谅

形容是「激死妈妈系列」，J.Arie承认入行以来都抱着反叛心态，不过好感激家人好体谅，「我仲系同佢哋一齐生活，但佢哋唔会知我个户口去到七师父个节目（《七救星》）讲到得番82蚊，因我唔会想同佢哋讲，佢哋一定会话『都叫咗你唔好做，难为自己又要做』，所以我唔会想同佢哋讲实则情况，但系19年开始佢哋见到我个眼袋愈嚟愈劲，愈嚟愈残，佢哋会好体谅，终于知道唔会再问『你几时唔做』，知道我唔系3分钟热度，我24岁时入行，同佢哋讲30岁应该会收档唔玩啦！做番份正正常常工，唔好再浮浮沉沉，但我30岁又再同佢哋讲不如再做多10年先，成唔成功都好，每个人成功定义唔同，我够食就得，唔使忧柴忧米下只歌有冇钱出。不过今次做只碟，终于讲到自己想讲嘅嘢，我成日讲做埋呢只碟应该都收山，都冇咩好讲，30年储落嘅嘢都讲晒。（储落嘅钱都使晒？）系呀！某程度上储落嘅钱要回一回气。」