独家丨入行20年 终靠《肥姜2.0》弹起 张文杰难忘拍《怒火》一提陈木胜即喊

由幕后开始入行20年，35岁张文杰（German）拍开动作戏，唔系演奸人就系做黑社会，最近凭演出《特务肥姜2.0》MV兼任动作指导成功入屋，German直认预咗拍住姜涛同肥仔实反应好，但出身动作世家的他，反而私心想MV吸引观众留意动作戏。作为动作演员German早前有机会参与陈木胜执导遗作《怒火》饰演「爆珠」，跟崇拜的陈木胜导演合作绝对是梦想成真，他更回想曾因错失跟对方合作机会一度想过转行，高大Man爆的他更因一番未及跟陈导讲的话搞到即时爆喊！撰文：杜杜 摄影：叶君海 发型：Matt Chau 化妆：Nichol Chau 服装：Moncler场地：Dada Bar + Lounge@The Luxe Manor

在《特务肥姜2.0》MV首度跟姜涛及肥仔合作，作为动作指导的German大赞他们不似新人，「拍动作系镜头不停360度转，靠自己sense机器去到边要做啲咩动作，要好讲经验，但话畀佢哋听个动作系点样，个镜头点样走，佢哋自然交到畀你，仲好准𠻹，唔觉得系新人！」对于两人身手，German亦有赞冇弹，「阿姜高大，唔使做咁足都有嗰种感觉，肥仔可能要辛苦啲，身型嘅问题要做多啲，但两个唔使教自然好型。（有潜质拍动作戏？）有，但要喺功夫上落多啲苦功，加埋佢哋对镜头敏感度就得。（留番3.0？）不如3.0谂吓整套电影！」MV令German成功入屋，他承认接拍时有私心，「我知道佢哋嘅歌、MV一定有人睇，我想令人睇完MV好想睇动作片，呢个反而系唯一私心，冇特登要自己好型好劲，想靠呢次机会畀观众睇到乜嘢叫香港动作。」



出身动作世家

German有此想法，因父亲张孝慈和伯父张存都是圈中人，他3岁接触中国武术，精通多种武艺的他，01年入行做电视及电影特技工作，亦担任动作设计和演员替身，09年转向幕前发展。作为爱动作戏的人，早前能够参与擅长拍动作电影的陈木胜导演作品，绝对是梦想成真。其实他早在5、6年前已有机会跟导演合作，「倾到如火如荼，突然间同我讲『因某啲原因你个角色改咗』，嗰个阶段我啱啱尝试离开幕后做演员，等紧一个机会，终于等到拍大制作，仲要系陈木胜导演，初初收到消息好兴奋不停去准备，最后冇得参与，会觉得我系咪唔适合做呢行，成个人沉晒，不停打电话畀朋友问点处理，处理唔到谂住转行，但突然叮一声醒咗，我用个嬲嘅心态当同陈木胜导演讲，『你唔搵我！我要你有一日会搵番我去演一套戏，你搵得我唔会令你失望』跟住我好勤力去学嘢，练戏同身手，希望有日再拍到陈木胜导演嘅戏，之后有日公司同我讲陈木胜导演有套戏开想搵你，我等咗呢个机会好耐！」讲到呢度他突然忍不住流下男儿泪，边喊边讲：「我可以话一出世就做呢行，呢件事令到我想放弃，畀我坚持到呢一日，觉得冇白费。（真系同到导演合作感觉点？）一路好锺意佢作品，今次学到好多嘢，啱啱嗰段说话其实一路好想同佢开心分享吓，佢唔知呢件事影响我好大，点知已经冇机会，觉得好可惜，不过最可惜系冇咗陈木胜嘅电影。」

见梁咏琪变小粉丝


铁汉柔情，German有感性一面外，跟「女神」梁咏琪（Gigi）合拍新歌《流金岁月》MV`即变小粉丝，听闻在现场仲挂住望「女神」，「都唔系听闻，我系呀！哈哈！女神嘛！好细个睇佢啲戏同埋听佢啲歌大，真系好锺意佢，好锺意睇《初恋无限touch》，电视台不停重播我就不停睇！（见到女神唔识做戏？）咁又冇，拍嗰阵都系当佢系我女朋友揽，都好正常！（赚晒？）赚㗎！我唔收钱都可以，但公司唔得！但如果Gigi佢开到口唔收钱都会做，佢打电话畀我『喂German！』（有你电话？）冇啦！哈哈！」



动作和谈情，连搞笑也难不到German，最近跟前辈李司棋和梁祖尧拍广告，首度以女仆造型亮相劲爆笑，「导演问我『形象得唔得㗎』，我讲『都冇形象』佢真系好大胆叫我着呢啲衫，女装以前做女替身成日着，今次着觉得好靓罗！我仲要求画个心心喺面度！但啲喱士喱士好拮，同埋对鞋好唔舒服。（下次再激着宫廷爆乳装晒41寸胸肌？）我平时都爆乳，宫廷爆乳可以加番啲功夫，同埋可以挑战《翠丝》2.0，同黑哥整番个《翠丝》对决耍埋剑。」