林子博带子女移居英国波折重重 开网上频道分享生活难题

50岁嘅前无綫娱乐新闻台主播林子博太太董燕君（Shirley）于上年不敌癌症逝世，今年8月林子博带埋一对仔女移民英国，离开伤心地重过新生活，遵从亡妻嘅遗愿好好栽培一对子女成材。身在英国曼彻斯特(曼城)嘅林子博喺youtube开咗个《子博在英国》频道讲留英生活，首集昨晚首播，播出15小时有二千四百观众收看，唔少网民送上祝福及留言叫他加油。

 

子女未返到学

精神饱满的子博对住镜头正式交待喺英国嘅生活，他说：「大大话话嚟咗英国一个月时间，唔少朋友透过唔同平台问我习惯咗英国嘅生活未？系咪经已Settle落嚟？小朋友系咪返咗学呢？实不相瞒，小朋友仲未返到学，𠵱家我哋仲住喺酒店。」他唉一声续说：「原来唔系咁简单，因为住唔起大城市伦敦，就拣咗第二大城市曼城，当日谂住先搵间酒店落咗脚，再搵租盘，但呢度嘅业主系要睇租客有冇工作，唔系话肯交一年租金就随便租屋出去，所以就棘住咗好多相关嘅嘢，好似仔女搵学校要有正式嘅租约证明，而酒店唔算系住址证明，除非租Airbnb旅居，所以小朋友未有得报学校，𠵱家仲喺度搵紧屋嚟租。不过，日内会转住Airbnb，始终住酒店冇炉头煮食，除此之外冇得洗衫，要经常出去食嘢同洗衫真系好烦。嚟度我第一时间租车，但呢度啲人慢活，租车都等成个月。」

边学边做整饼

第一次去英国的子博，认为去到一个人生路不熟的地方，生活照应好重要，幸而英国由南到北都有朋友，他有朋友喺曼城市中心开咗间甜品外卖店，因而由朋友做盲公竹。之前朋友店铺唔够人手，他落铺帮手整月饼及菠萝包，但强调唔系转行：「我发觉都几好玩，但饮食业时间好长都辛苦，自己要拜师学艺，边学边做，至少要有认识，先够胆效发朋友开店。」他又表示，喺英国最唔惯饮食方面，因为香港太多好西：「呢度keep住食汉堡包、沙津、薄饼、有时食到中餐炒饭、炒面，连意粉都少食，真系好挂住香港茶餐、豆腐花、粥、油炸鬼、泰菜…连五香肉丁喺呢度嘅中国超市都买唔到，至于其他生活细节ok。」

 

唔够分去加国

他坦言其实首选去加拿大居留，除咗有好多朋友喺加拿大，仲有相熟朋友搭咗路，可以喺当哋电台反电视台开咪及做节目，做返自己喜欢嘅工作，无奈唔够分申请技术移民，英文程度又低唔可以读书移民：「幸好英国教育喺世界排头几位，同小朋友嚟呢度未尝唔系好事，而且我今次冇包袱离开，我喺香港冇正职兼冇物业，我只系带住4个大行李喼及5-6袋嘢，另有枝结他。至于船运就有28箱物品，当中有衫裤鞋袜仲有相簿、数码钢琴、木箱鼓、卡拉ok机、游戏机、电脑…最好家档唔好咁快到，因为未有地方住，否则又要畀仓租。」