独家丨柯炜林开心谢安琪亲教弹琴变「天后御用」拍档

2021-09-17 20:15

柯炜林（Will）16年凭电影《点五步》崭露头角，先后拍过多部电视及电影，早前在电影《浊水漂流》「木仔」一角再引大家注意。近期Will更成为MV及广告抢手货，特别跟天后谢安琪（Kay）连环合作，先在对方新歌《离不开》MV出任男主角，再双双合拍保险广告，Will最开心获谢安琪亲教弹琴。撰文：杜杜

Will谓在《离不开》MV的Casting中，已初次跟Kay见面，「虽然唔知佢有冇份拣我去拍，但睇得出佢投入度好高，可能今次首歌系曲词编监都系佢自己包办，所以MV佢都一样跟得好足。」MV中Will有个弹琴场口，但他本身不懂得弹，事前导演已将弹琴短片给他来模仿，「我真系完全唔识得弹，所以要靠死记去做，好记得去到现场Kay知道我唔识弹，亲自嚟教我个节奏同姿势点样先至似，感觉真系好亲切。」

恨同林嘉欣合作

到一场喊戏，Will继续获天后特别照顾，「佢专登过嚟同我倾偈，问咗我好多嘢，好多关于爱嘅嘢，导演之外佢都好肯花时间帮我培养感情。」Will感到份外受宠若惊，因本身也是Kay的歌迷，「佢啲碟我好多都有买，又有经常听佢嘅歌，所以可以有份演绎佢嘅MV真系好开心。」Will估不到机会继续有来，两人再合作拍广告，「真系冇谂到咁快又合作，我记得拍广告嗰日我同佢打招呼都话『我哋又见啦！』佢喺现场仲帮我起咗个花名，佢会叫我『牙Will』，其实佢都几搞笑，希望之后真系再有合作机会啦！」

除了跟Kay合作外，电影《浊水漂流》令Will有机会跟两大影帝吴镇宇和谢君豪合作，他坦言绝对是成就解锁，问到还恨跟那个前辈合作，Will二话不说是「女神」林嘉欣，「我中学嘅时候睇《六楼后座》已经好锺意佢，佢做戏好好，笑容又好甜美！可惜入咗行一直都未有机会合作，连同场嘅机会都未试过，所以真系好想见到佢，当然有得合作就更好啦！不过之前我同佢都有帮同一个家品品牌拍广告，啲广告放埋一齐勉强算系合作咗！」