程美段自爆曾被「淫媒」睇中：肯去可能机会更加多

电影《#PTGF出租女友》将于下周三（22日）上映，首次拍电影的程美段饰演性感又主动的PTGF，经常对赵善恒（恒仔）作出挑逗，她直认初时感到有点紧张：「我觉得恒仔本身怕怕丑丑，但系好有礼貌，最后大家都要摸索，拿捏去到边个位最舒服就放胆去做，唔使take咁多，宁愿放胆啲一次过去做。」她称拍摄前大家有沟通，加上恒仔做过导演，会令演员在拍摄时更顺畅自然。

不过在拍接吻戏前，程美段一定要刷牙保持口腔清洁：「肯定自己个口唔臭先，食完lunch都惊有味，我嗌咗个芥兰蒜蓉，都要刷个牙先。」至于今次拍戏最深刻的事情，她表示是一场自high戏，她觉得相当难拍：「同恒仔有缠绵戏，后尾系自己一个俾反应动作，自己幻想去投入，镜头净系影我自己，我觉得仲难投入，反而同恒仔有肢体接触会容易进入戏中状态，最后我要饮威士忌先入到戏，如果唔系俾唔到反应。」程美段形容这场戏是「进行中」，「又嗌晒又俾晒反应，好兴奋，冇人掂要自己掂自己扮有人掂，好有难度，要催眠自己。」由于只靠幻想，所以最后她都拍到略带醉意。

做PTGF为钱，娱乐圈都有神秘饭局，有指女星出席会有利是收，程美段反问：「会俾返钱架咩？成日听人讲饭局，但从来唔明咩定义，食饭咪食饭，一班人朋友食饭，加个局字，饭局有咩特别？唔知代表咩。」她称没有出席过这些饭局，反而遇过疑似「淫媒」的人士，「淫媒？讲真好似试过，我觉得有啲怪怪地，又唔知边个，唔知有我电话，打嚟讲啲嘢好奇怪，好惊呀，印象中系佢唔知点解佢知我系边，叫我今晚去边度识边一个人，可能食吓饭唱吓K，问佢系边个唔讲，我怀疑系一啲我见过嘅人，但依家冇啦。」她觉得可能因为有时形象性感而引来这些人「注意」，问她是否守得住底线？她即答：「守得住，如果唔系我可能机会更加多。」