【独家】陪人Shopping一样咁开心 57岁唐丽球笑容有少女味

介绍返相中人，佢叫唐丽球，花名叫波波，1984年港姐季军，今年57岁，有留意娱乐新闻嘅对佢应该有啲认识，因为今年港姐开记招，佢都有出席㗎，而佢作为今届慧妍信托委员会执行委员会副会长，成日都同副主席向海岚及会长翁嘉穗去做善事，例如转赠「爱心百家被」畀有需要人士，又会去探访公公婆婆，心善人美真系冇讲错，熟女波波仲系好Fit好靓吖。
采访:梁志明

波波早前出席活动表示老公吴毅将因工作关系经常中港两边走，就算疫情下都Keep住。至于17岁囡囡已由加拿大返港，她表示囡囡觉得唔适合当地环境，正计划到韩国继续学业。波波说：「囡囡一直都喜欢韩国文化，但唔系迷韩星，亦无打算做女团，纯粹喜欢韩国。」波波仲话唔介意囡囡同韩仔拍拖。

Shopping吹下水

日前傍晚，着住黑色Tee同牛仔裤，好开明嘅波波同两女一男朋友去铜锣湾名店坊行街，较后生的一男一女入咗Y-3，波波及另一女友人跟埋入铺，见波波好认真系咁睇，有时揭吓啲衫又拎起啲鞋，睇得出佢唔啱，但望吓又好啫。波波喺铺头逗留咗成粒钟，男友人买到嘢，之后一行四人行去礼顿道一间Bar & Cafe，呢间铺之前已见过波波去过，应该系朋友开设，见众人入咗去之后门口就挂上Closed牌，自己地方点倾点玩都唔使惊。喺门口听到铺入面播放音乐，都几大声但又听唔到系咩歌，总之听完个人好想郁，好似波波咁，见佢间唔时Un身Un势，仲笑得好少女添，有街去有friend陪，开心都正常嘅。