【独家】疫情带挈 捞皮纹分析师好搵过幕前　陈嘉桓自认麻烦难搵对象

拥D Cup丰满上围兼长腿的28岁陈嘉桓（Rose），日前于TVB综艺节目《开心大综艺之暑假玩到尽》中，跟一班女星斗「胸」狠掀起不少话题！由16岁入行至今，Rose的花边新闻较演艺作品更引人关注，她自认过去烂玩、唔黐家，但经过疫情长期Stay home，其心态也有所转变。将绯闻男友黄宗泽（Bosco）降呢朋友的Rose，去年因疫情幕前工作大减全力转做皮纹分析师，望再创一番事业，至于感情事？单身的Rose自认性格极端，难找到一个好夹的对象，所以急唔嚟。撰文：黎宝伦　摄影：叶君海　场地：Aqua

过埋下年生日就29+1，开始出现「初老症」的陈嘉桓，近年经历亲人和爱犬先后离世，令她决心不再浪费时间在毫无意义的事情上，「以前收工会去饮一杯Chill吓，而家都冇饮酒。年初我只狗急病，一个月就走咗，嗰段时间做完嘢就好想快啲返去陪佢，希望所有时间畀晒佢，所以呢半年嘅转变有啲大，亦珍惜多咗同屋企人一齐嘅时间。」早几年仍会谂几时结婚，但人成熟了，Rose反而想努力推广皮纹分析， 「见身边好多朋友举家移民，都会谂搞掂自己先啦。（恨拍拖？）恨唔嚟。」

爱年长男
身边不少朋友为Rose牵红线，她直言「夹硬去识一个人好怪」，认为两个人要相处过才知大家的生活习惯，故宁愿慢慢嚟。Rose又笑称现时会先分析男生皮纹，择偶会拣有正箕和弧形纹，即富同理心、随和、顾家的才华男，最怕有螺旋、双箕和伸长斗纹，「劲好动嘅人即系时间管理大师，我都惊好大男人、收埋唔讲嘢。（怕太Social好花弗？）少少啦，如果对熟嘅朋友先咁样，对外正正常常，我又觉得OK。（接受另一半更重视朋友？）唔得，以往我都锺意一大班人，但而家宁愿留喺屋企。」并谓不喜欢年下男，偏好成熟、识享受生活的男人，就算大10年也不介意。

继续性感
Rose做皮纹分析师之馀亦有教班，为她带来稳定高收入，但她对幕前工作兴趣不减，以「打女」出道的她拍过《叶问前传》、《竞雄女侠秋瑾》，「我系活在当下，如果有得入剧组拍几个月都好玩，电影就好想拍时装嘅打戏，因为以前都系拍古装、民初，网剧《反黑》都唔系打好多。」问开班教授皮纹分析后，可会顾及专业形象而减少性感演出？Rose说：「唔会，我都唔太明啲人话要『封胸』、唔露，其实冇需要发一个声明讲，随心罗，一个普通人都系睇心情拣着咩衫㗎啦。」