【独家】恨搵《智能爱人》C君做男友麦美恩为做喜剧演员未谂拍拖

2021-09-03 00:30

麦美恩（Mayanne）在《智能爱人》除了跟李佳芯大跳性感椅子舞令观众惊喜外，剧中难得集齐TVB三大极品陆浩明、泰臣和C君做男友，段段情亦超出位，特别是默默守在身边的C君。现实中，Mayanne都想搵个如剧中C君的好男仔拍拖，可惜她太享受工作爱上演戏，更希望挑战做新一代喜剧演员，所以未得闲谂拍拖。撰文：杜淑霞摄影：沈健程形象：KathyK 发型：Kenneth Tung化妆：Soey Li

Mayanne形容「古家仪」角色好黐线，「将一个女人缺点摆晒喺佢身上，所以我将自己好丑样表情放落去，大家平时见唔到Mayanne呢啲样，而佢成个遭遇系过山车咁，角色好有发挥同挑战，演起来好过瘾。」讲到剧中三段情个个极品，她笑言跟最熟的陆浩明演的「浩浩」谈情，自己都毛管戙，「我睇自己啲眼神好难顶，自己都起鸡皮！拍嘅时候嗰种深情要麻醉自己，搵佢嘅才华同迷倒女仔嘅吸引力。」

挑战做新一代喜剧演员

跟泰臣演的智能人「Rocky」拍拖，Mayanne觉得最浪漫，「我哋喺西贡拍咗成日买雪糕戏，好浪漫好似MV拍得咁靓，好容易令人投入呢段感情，可惜呢段情喺最sweet时失去咗。」至于压轴跟Ｃ君演的「标基」成为一对，Mayanne直言忍笑最难，「佢好深情咁样示爱，但系忍唔住笑，啲人话好想打我，我都好想打『标基』，后尾呢段情好sweet，有个美好结局，原来最终女仔要个好简单好纯朴一路喺身边嘅男人已经够。（似唔似你爱情观？）都似嘅，但呢刻我又未去到嗰个阶段，呢个人未出现。（太忙出现咗唔知？）发生都唔奇，因为我太锺意𠵱家做紧嘅嘢，太享受戏剧世界畀到我嘅嘢，现实啲嘢未必处理得好。」爱上演喜剧的Mayanne，更以前辈吴君如和苑琼丹为目标，「前辈周星驰、吴君如点解咁好笑，佢哋有种国际语言就系肢体语言，任何一个人睇都有共鸣识得笑。我想做一个有认受性嘅喜剧演员，我提吴君如因为佢真系一个成功例子，之后苑琼丹跟住就冇，我希望可以向住呢个方向去挑战。」