【独家】化身魔鬼教练教头条读者玩剑击 森美好心野乜都试对老婆最持久

上周四晚，森美以全套击剑服上阵，化身魔鬼教练为头条娱乐FB专页举办嘅《与星有个约会-森美亲自教玩剑击》打响头炮，亲自教导3位得奖幸运儿剑击，个半小时嘅课堂娱乐资讯并重，每人都笑住离场，得奖者都话试玩完好有兴趣继续学。另外森美又指自己好心野，样样运动都想学，但last得唔耐，笑笑口话：「last得最耐系我老婆，因为老婆最忍到我！」他又以儿子为荣：「佢样样都超越咗我，AL考获4A*成为状元。」采访：方骞平 摄影：叶君海、沈健程 场地：剑舍

曾经系「学界剑神」嘅森美，由中五开始帮学校打剑击A Grade赛事，曾勇夺团体赛冠军，重剑及花剑个人赛分别夺得季军及第四名，绝对胜任今次为头条娱乐FB活动出任剑击导师。当晚他一对三训练学员，搞笑森美形容3人似足ERROR嘅肥仔、193及保锜，而他就系MIRROR嘅AK(江𤒹生)！课堂主要传授一啲基本功，森美指导「ERROR」前进(advance)、后退(retreat)、弓步前刺(lunge)及持剑站立姿势等。

谂计出古惑招赢对手

「剑击ERROR」之后活学活用，向前一步弓步刺穿墙上嘅红色中心气球，其中以「193」拮到中心旁边嘅绿波成绩最好，可以戴上面罩挑战森美，狙击拮爆黐系佢身上嘅气球。森美虽然3年前跳落马整伤腰骨冇再打剑，但技术仍然Keep到，闭目示范一步弓步前刺，成功拮爆墙上的中心气球，睇到3位学员拍烂手掌！森美又大赞学员好有天份：「其实唔系教(佢哋)，系玩吓啫，等佢哋感受到剑击开心嘅地方。而我亦有好多回忆返晒嚟，玩剑击考验反应及脑力，最记得细个时有好多活动玩冇乜时间练剑，而且体能差啲，所以出好多古惑招嚟赢人，会着对袜头松嘅长袜，进攻时借故拉袜头去唞唞气，点知用多几次就畀裁判警告(笑)。」森美自嘲周身刀，但last得唔耐：「last得最耐系我老婆，因为老婆最忍到我！我又衰嘅，脾气差。」

爆状元儿子AL考获4A*

提到准备返英国升读大学嘅囝囝曦乐原来都系「校队剑神」：「当日我哋喺屋企一齐睇张家朗夺金，佢即时叫返我打(剑)，摆明系挑战我，想落我面！因为佢细个时剑击系我哋嘅亲子活动，但我成日闹佢动作做得唔好，𠵱家佢所有运动都叻过我，游水可以游到40个塘、跑步可以跑40分钟…如果连打剑都赢埋我，佢完全赢咗我，所以暂时我系唔会同佢对打嘅。」森美又忍不住开心报喜：「上次佢喺英国中五公开试考到11科A*，啱啱派嘅AL成绩就考获4A*成为状元…哎呀…佢又会话我『有乜咁大不了！唔好成日周围同人讲啦！』我𠵱家好明白阿爸心态，真系会好开心！佢读书叻我好多，不过我会多啲教佢品德，因为呢个最重要，我觉得自己身教唔够。」