【头条戏场】《危楼深渊》 爆笑自救逃生指南

由车胜元及李光洙等主演的《危楼深渊》成为韩国年度开画票房NO.1，电影Sell灾难喜剧，究竟面对灾难可以点样笑得出呢?抱住成头「黑人问号」入场，散场后好有感觉，灾难喜剧果然又灾又喜，好笑程度系哈足全程，笑位完全估唔到，减压一流，金志勋导演好嘢。(9月2日上映)

撰文:廖思慧

金志勋导演拍完大型灾难钜作《火海108》之后想拍一套更人性化的电影，然后有一日睇到一则关于海外的天坑新闻片段时非常好奇，「如果喺韩国出现咁大嘅天坑会点呢？如果我跌咗入去又会点呢？如果我啲家人跌咗入去又点呢？」然后导演就开始构建角色同佢哋嘅故事，「我冇专注灾难本身，只想展示人类应该点样面对灾难。」

屋企要有求生包
为咗搬到首尔方便返工，东元（金成昀饰）辛苦11年终于成功上车买楼，搬新居无耐已觉唔对路，自私同事金代理（李光洙饰）发起举行入伙Party，饮饱食醉嘅两人连同一众邻居，包括同东元早有牙齿印的万寿（车胜元饰）一齐直堕地下500米的深坑。500米又几深?嗱，香港最高嘅ICC都只系484米咋。被困时可以去厨房摷食物同水，求生物品都唔太难搵，但撞正暴雨，拯救队又因为天坑随时再下陷而未能派员拯救，用航拍机拍摄求生者又因太深收唔到讯号而「堕机」，时间一分一秒咁过，以为死路一条?唔好睇小人类嘅求生意志，避唔到一齐撑落去。

咪以为只有李光洙引你笑，车胜元原来更癫，全片笑位计算得啱啱好，导演功力好强，散场时一身松晒。