【独家】突然失声遇事业「荆棘海」泳儿一度想过放弃唱歌

2021-08-25 21:15

泳儿（Vincy）继「花朵」及「沟渠」系列后，最近推出「大海」系列的第一部曲《荆棘海》。她坦言事业上亦遇过最大的「荆棘海」，就是17年突然失声经历，令她一度想过放弃歌唱事业，但过了这难关反而令她变得更强。而早前担任《声梦传奇》导师，她觉得经验难得，更有信心挑战其他真人骚。撰文：杜淑霞摄影：谭壹致发型：Zivyeunghair@leonardo3 化妆：King Yip @KINGS MAKEUP 服装：Amelie Street 场地：Coffeelin

Vincy解释虽然《荆棘海》是「大海」系列的第一部曲，但跟之前「花朵」及「沟渠」系列有关联，「之前出咗花系列，花跌落沟渠，沟渠流向大海，辉哥（音乐人周耀辉）好犀利，佢觉得唔可以成日留喺个沟渠，系时候行出嚟，呢个唔系普通嘅海，系个《荆棘海》，充满伤害刺痛同挑战。」

放胆尝试其他真人骚

谈到在事业上最大「荆棘海」，Vincy肯定17年突然失声这个难关，令她事业一度很迷茫，甚至想过放弃唱歌，但跨过后反而变得更强，「嗰时谂既然我唱唔到歌不如放弃，但同期我都好积极去解决呢个问题，都要试谂办法去解决先考虑放弃，虽然心态上觉得好攰，但呢次失声令我寻求好多唱歌方法，系有得着，唔系用番同一把声去唱所有歌，所以觉得冥冥中注定要经历呢样嘢，都好感恩畀番把声我，𠵱家谂番呢啲荆棘好似安排咗发生。经历咗咁多嘢，发现点解唔放开自己表达内心嘅嘢，应该同人share，以前觉得做歌手一定要收埋。自己出道几顺风顺水，好快有自己作品，好多嘢唔使自己去谂，都几依赖，发生咗事学识自救。」

早前首度拍摄真人骚《声梦传奇》担任导师，Vincy觉得是个难得经历，「由初初有啲迷茫，因为识唱唔代表识教人，真系会有啲压力，因为我好少喺镜头讲咁多嘢，后嚟愈嚟愈投入，教佢哋嘅嘢有时都会提醒番自己。」有了这次经验她更想多试真人骚节目，「我想试个真人骚系特训我跳舞，搵一啲唔识跳舞嘅歌手一齐学，或者试一啲未试过嘅嘢，好似有啲真人骚系做一啲未做过工作，我可以豁出去。」