【独家】睇奥运好热血剥衫划独木舟 谢高晋洗冷气捱面包贴钱追歌手梦

香港运动员喺东京奥运满载而归，创出1金2银3铜佳绩！施匡翘的28岁师弟谢高晋(Kochun)特别感触，因为他既是歌手亦是澳门甲一篮球队成员，打紧职业赛，双重身份背后经历过唔少辛酸，包括运动员生涯日操夜操，仲要经常受伤，入咗行又唔够工开，时至今日仍然要靠「秘捞」先顶得住！采访：方骞平 摄影：张咏森

谢高晋最爱打篮球及划独木舟，加上睇奥运睇到好热血，日前佢就出海划独木舟，划咗一阵听见天文台发出雷暴警告，惟有急急上岸冲身！高佬谢高晋细细个就紥紥跳，妈咪安排他读兴趣班发挥运动细胞。14岁就开始打篮球，16岁首次参加公开比赛夺得「篮板王」，再打港青，却因比赛时跳高抢篮板严重受伤被迫休养：「运动员生涯好辛酸，每周操足6日，朝朝早5点起身跑步keep住体能，午饭后要进行特训同埋加操，而且要keep住健康饮食，冇得饮汽水食垃圾食物。」

入行初期做过地盘炒散
谢高晋暂停职业篮球生涯后，13年获朋友介绍返杭州客串古装剧《侠客行》，自此入行：「记得喺15年拍电影《同班同学》成日走错位畀导演闹，不过学到好多嘢。」之后他又拍过内地嘅网大，又入返澳门战狼球队。2019年曾杀入《全民造星II》99强，最后决定退赛转战内地综艺节目《我要打篮球》，两年前出歌做歌手：「最辛苦啱啱入行，好似盲头乌蝇咁要周围搲捞，记得每日队完几个面包就要搭车去柴湾、观塘、荃湾casting，天南地北每日车费已经用咗70蚊，当时啱啱毕业冇乜钱，惟有去地盘炒散搵快钱，每日都搵到800至1000蚊，我仲会同朋友做埋啲冷气工程，谂返起虽然辛酸，但好感激个判头咁支持我去追梦，每次我要去casting都畀我早走。」

入行以嚟，谢高晋见报最多系得到确诊师姐施匡翘「带挈」入住骏洋邨隔离营，问到𠵱家经济状况，他爆料话仍有秘捞：「坦白疫情下工作唔多，好彩一直同朋友合作接啲冷气工程，收入算系稳定。同埋尽量悭啲使，无事出街少破财嘛！虽然我人高食量大，但每次队几个面包就够，唔使要食好西。」