【独家】14岁入行极速成长 《声梦》Chantel戒坏习惯Yumi变时间大师

《声梦传奇》一班参赛者人气劲旺，明晚更举行毕业演唱会《声•梦飞行First Live On Stage演唱会2021》，当中除了冠军炎明熹（Gigi）受欢迎外，夺得亚军和季军的姚焯菲（Chantel）和锺柔美（Yumi）一样迷倒不少粉丝。两位只得14岁的小妹妹都坦言参加比赛，除了令歌艺有进步，亦令她们在生活上亦急速成长，Chantel开始戒掉大头虾坏习惯，而Yumi亦从中学懂分配时间，虽然TVB讲明力捧，但Chantel和Yumi有信心学业和演艺工作两边兼顾。撰文：杜淑霞 摄影：梁有财

比赛完成了一段日子，Chantel和Yumi觉得除了学到歌唱技巧，以及认识了一班同声同气锺意唱歌的好朋友亦相当难得，原来比赛更帮Chantel戒掉坏习惯，「学识点样照顾好自己啲嘢，唔会周围唔见，虽然呢样嘢要再学习，有时仲会有甩漏嘅。（试过唔见啲咩？）电话、银包、八达通都试过，乜都试过唔见，好搞笑，不过𠵱家进步紧。我试过摆低咗个电话喺公司，跟住出咗出面做嘢，（锺：跟住佢就冇得用电话！）系呀！成日冇得用，好彩搵得番，（记得摆边个位？）唔记得呀！」Yumi一样在音乐之外亦有所成长，「最大转变系分配时间，参加呢个比赛都要顾埋学业，啲schedule比较密，有一排仲要考试，嗰时又去到比赛尾声，最辛苦时候，系有少少压力，但系好好嘅挑战，要顾住学业同顾住唱歌两边，系个好好嘅学习机会嚟。」


仿效韩国女团


TVB早前已公布会力捧一班《声梦》参赛者，极有潜质的Chantel和Yumi当然不会例外，两人坦言目前都会以学业为重，Chantel说：「我哋始终都系学生，如果平衡得好嘅话，唱歌同埋学业系可以并存嘅。」Yumi亦好认同，「我觉得学业对我哋嚟讲好重要，唱歌一直以嚟系兴趣嚟，如果有呢个机会唱歌可以去尝试，但唔一定要真系放弃学业去追求，如果自己handle得到，两样嘢都可以辜负（姚：哈哈！）系兼顾到，哎呀！」

对于有指TVB安排她们以女团形式出道，两人觉得女团或者个人发展都有好处，况且仿效韩国女团，一样可以有单飞机会。Chantel说：「两个都系好事，女团可以多啲人陪你，单飞就学识独立，我自己好需要学识点样独立。（锺：佢系一定要人陪住）佢（Yumi）细过我，但系佢照顾我多啲，唔知点解，所以我系好需要学识独立。」Yumi说：「女团同单飞各有好处，真系安排咗畀我哋都可以尝试，可以多方面试吓（好似韩国女团咁间中单飞？）都系。」


演戏怕喊唔出


讲到即将跟其他参赛者一齐拍春青剧，两人都好期待，因为《声梦》成员又可以聚首一堂，不过冇演戏经验的Chantel最担心演喊戏会应付唔到，「我做唔到喊嗰啲，我可能要等阵先，滴眼药水再返嚟。同埋我忍唔到笑，你叫我做喊戏忍唔到笑，唔系太好。」反而
Yumi对Chantel有信心，「佢好多表情，开心扮唔开心，又识撒娇咁！」自小做童星的Yumi虽然坦承演戏经验对参赛都有帮助，但讲到再拍剧，她一样怕自己喊唔出，「细个好容易喊，因为可以谂番起啲唔开心嘅嘢，但𠵱家我就好开心，个人开始正面，可能喊比较难啲。」


讲到未来在娱乐圈发展目标，两人即时变得好成熟。Yumi说：「我冇话一定要似边个，自己有几个偶像，容祖儿、邓紫棋，每个歌手都有佢哋好嘅嘢，唔一定话跳嗰啲舞唱嗰啲歌，喺每个人攞佢哋啲好嘅嘢嚟学习。」一向好欣赏Gigi的Chantel，继续以对方为学习对象，「如果喺呢个比赛我好欣赏Gigi，佢嗰种唱歌态度系好正确，佢系一定唔会偷懒嘅人，佢一定好努力练习，但我都系好似Yumi咁讲，做好眼前嘅嘢先，因为如果唔做眼前嘅嘢，就好似叠上去嘅层层叠咁，冇咗𠵱家嘅嘢，你一定上唔到去，所以做好自己目前先。」