星岛独家｜莫文蔚上半场完美落幕 誓与老公永不分离

今年是莫文蔚（Karen）在演艺圈游走第二十八个年头，刚过去的6月，Karen在香港红磡体育馆举行《绝色莫文蔚世界巡回演唱会》，以香港作巡唱的最后一站，同时亦宣布是最后一次举行大型演唱会，更特别制作了The Visual Album（影像专辑）《The Voyage》，重新演绎5首经典的广东歌，为自己的上半场画上完美句号！

撰文∣Cynthia　摄影∣谭志光

纪念出道二十五周年，今年51岁的莫文蔚（Karen）在2018年举行人生最后一次大型巡唱《绝色莫文蔚世界巡回演唱会》（UNIONPAY Presents KAREN MOK THE ULTIMATE GRAND SLAM SHOW），走遍世界四十个城市的巡唱。最后一站，莫文蔚选择在红馆举行一连三晚演唱会，完成巡唱尾站。她特别制作了The Visual Album（影像专辑）《The Voyage》，以音乐纪录片配合现场收音的形式，带乐迷重游《喜剧之王》其中一个重要拍摄地点——石澳健康院，Karen表示：「首先好难得隔咗咁多年之后可以返嚟香港出广东唱片，上次出广东碟已经是二十年前，跟住觉得除咗有几多新歌曲之外，又想有几只经典歌曲系大家都会锺意，同埋我自己好想用唔同的方式重新演绎。如果就咁行入录音室、就咁一个唔同嘅版本好似唔够好玩，所以就谂到呢个idea，呢个影像专辑，就可以令到大家听歌嘅时候唔系斋听，都要有埋个画面，咁啱我哋又拣咗几只同样来自电影嘅主题曲或者插曲，更加顺理成章觉得歌曲要配合画面，我又锺意唱live，于是决定去返石澳，即系我哋拍《喜剧之王》取景地，喺嗰度用live Band方式重新演绎，真系好正！有几只歌都系我想重新演绎，例如《食神》最尾的音乐，我系唱咗一段初恋嘅歌曲，但唔系一个完整嘅版本，在电影中只不过出现半首，我觉得系时候要认真去唱呢只歌，配合画面去讲故事。」

重游石澳感触良多

因为工作和外籍老公Johannes的关系，Karen经常要走遍世界各地，甚少有机会长留香港，她亦直言已经多年没去过石澳，藉着今次制作影像专辑，终于有机会重游旧地，Karen感触良多，回忆道：「其实我真系好多年冇去过石澳，我谂真系二十年前拍呢套戏嘅时候，之后都冇特别落去石澳行吓，所以今次有咁嘅机会就觉得好正。咁多年来喺香港嘅时间好少，有机会返嚟香港都唔会特别去边度散吓步、散吓心，所以今次就乘机畅游一下！好似去sightseeing。咁多年后返到去石澳，其实本身个印象都好深刻，尤其是喜剧之王呢套电影都打动好多人，有啲场面或者场景特别iconic，特别系健康院出边嗰个地，跟住又有棵树，侧边又有海，呢啲画面系入晒脑。所以拍之前我都话一定要去返嗰棵树嗰度，谂住攞嚟做背景，但点知我哋谂住去睇景嘅时候，原来前几年打风，个棵树已经冧咗，好伤心！但其实去到所有嘅感觉已经返晒嚟！」

主动相约 老友叙旧

由于疫情关系，Karen去年终于有机会和老公留在欧洲，享受真正的二人世界，今年回归香港，除了抽时间陪伴妈咪，Karen亦趁机会相约一班朋友叙旧，问她是否属于主动联谊的人？Karen直认不讳：「我主动㗎！我以前仲离谱，以前未有email或者WhatsApp的时候，最多系打电话，有时因为工作关系我会去唔同地方，因为以前曾读过国际学校，认识好多唔同国家的朋友，离开学校之后大家就失散咗、各自回国唔会再特别联络，开始工作之后，如果有机会去其他地方，有些10年冇见的朋友，我都会无端端打去佢屋企，跟住就话『喂！我系Karen，我嚟咗你个城市！』佢哋就会癫咗，好开心！所以我系会好主动做呢啲嘢嘅人！」

经理人操刀填词

新专辑内其中一首歌《原来...甚么都有可能》由Karen共事十多年的经理人Joey填词，歌曲背后亦有故事，Karen表示：「这首歌我一听到旋律就觉得好特别，好有气质、好high！好似有两把声音喺度对话。一直好想有一首歌系回应我人生中第一只single，就系1993年出道的第一只派台歌《原来没可能》，当时心谂点解唱片公司会俾一个新人呢只歌名？好似唔系几好意头，应该「乜都有可能」先至系㗎嘛！呢件事我一路留喺心入边，觉得冇理由咁嘅，有一日我一定要做返一只歌嚟同呢只歌有回应！二十八年后，做咗好多好开心嘅成就，一路上好精彩、好好玩，嚟到呢个moment，所谓嘅上半场去到一个终点，所以成日都会同我经理人Joey讲，有一日一定要整一只歌叫《原来甚么都有可能》，为自己争番啖气，咁啱又碰到黄妍俾我呢只旋律，就觉得呢只歌掂呀！够有型去讲一件咁嘅事，亦都觉得呢只歌嘅歌词一定好难写，所以就交俾同事Joey写啦！我觉得大家投契就得，当然佢好了解我，因为我哋真系共事咗十二、十三年！」

暂别老公陪伴妈咪

讲到爱情，Karen和初恋老公Johannes相识30多年，两公婆默契十足，演唱会期间，Johannes更专程飞回香港，在尾场上台为老婆伴奏。Karen坦言想和老公永不分离：「老公仲系香港，我哋梗系想永不分离，哈哈！嚟紧佢可能都会有自己嘅事情要返去欧洲先，但我喺香港仲有其他工作，加上旧年成年都唔喺香港，所以今次返到嚟梗系要陪下妈咪，佢好挂住我！留多一排先，其实都好难plan，因为由旧年疫情开始，知道好多嘢唔系理所当然，plan唔到！」

原文刊于《星岛日报》名人杂志（逢周日见报）