【独家】最后实体个唱终极性感登场 莫文蔚唔离地赞好MIRROR有前途

之前MIRROR的六场嘅演唱会一票难求，原来莫文蔚（Karen）都系MIRROR Fans：「系人都锺意靓仔㗎啦！」而本月11日将再登红馆举行人生最后一次个唱的Karen将展现舞台上最靓一面。她超兴奋爆响口：「到时狂野嘅『莫猫宝贝』会隆重登场，我做嘅嘢离不开性感㗎啦！」睇嚟莫文蔚最后个唱有啲料到喎！采访：方骞平 摄影：谭壹致 发型：Kenki @W Workshop 化妆：Ling Chan @Ling Chan Makeup 形象：@yoyokwans @fameglory

莫文蔚相隔16年再踏红馆舞台，今次演出意义重大，除咗系《绝色》巡演尾站，仲系人生最后一次大型实体个唱。问到Karen可会依依不舍？她语带坚定说：「既然决定咗就唔会后悔，早喺2018年开始巡演时，已度好呢个系我最后一次大型tour，所以改名《绝色》，系终极一次，可能近十年唔系出碟就走埠，系时候要搵新意。老公Johannes听到我呢个决定都话好！因为佢最享受二人世界。但每次我走tour时，我哋要摄时间搵机会见面，始终结咗婚，唔可以成日将工作排喺第一位，咁样对佢唔公平，喺时间要调整一吓两公婆嘅节奏。」

「莫猫宝贝」拯救世界

Karen强调她不是以后不唱歌，只是人生去了另一阶段：「我依然会继续做我最热爱嘅唱歌同表演，只系开拓一啲新项目，如迟早会做嘅音乐剧，另外因为我锺意猫，最爱猫女造型，去年经已创作咗虚拟人物『莫猫宝贝』，由佢嚟发声，表达我想表达嘅环保、爱护动物等讯息。去年『莫猫宝贝』推出第一集漫画，好似超级英雄片咁有埋主题曲，做埋原声大碟，甚至设计埋『莫猫宝贝』身边嘅朋友、助手等，由佢哋去拯救世界，完全可以天马行空，真系好好玩，或者到时同黎明嘅『明福侠』crossover，唔排除将来做埋音乐剧，谂起都觉得正呀！呢个猫女都会喺今次演唱会性感登场。」

赞师妹黄妍多才多艺
入行25年嘅Karen主张顺其自然，就算《呼吸有害》于年头横扫四大颁奖礼亦绝不滥做，她认为最重要装备好自己，咁就可以随时应战，她亦给予乐坛新人贴士：「最紧要真心热爱音乐、表演同创作，其他唔使理咁多，要知道拍拖还拍拖，音乐还音乐，付出亦较其他行业多，如果唔系一条心去做捱唔到落去。」紧贴乐坛嘅莫文蔚大赞师妹黄妍多才多艺，有文艺气息；Serrini(梁嘉茵)声线够特别系可造之材；MIRROR呢堆后生仔会有一番作为：「佢哋有吸引力，尤其呢个年纪，(系咪锺意佢哋靓仔？) 系人都锺意靓仔㗎啦。」MIRROR嘅魔力，竟然搞到刚51岁生日嘅Karen回春发出如少女般嘅笑声！