【独家】传返内地拍真人骚　杜德伟珍惜时间凑仔食好

当日约下午4点，杜德伟与太太李晓冰（Ice）带埋囝囝AJ，相约商台DJ云妮及另一男友人，到又一城食Tea。Ice与云妮边食边倾好投契，将顶杏色Cap帽反转戴的Alex，就主力专心食面和揿电话，间中先搭句嘴。未几食饱的Ice忽然再Order嘢食，原来男友人凑埋AJ嚟会合爹哋妈咪，刚K2毕业的AJ好叻仔，唔使妈咪监督，都可以自己专心地拎住支叉卷意大利粉食，不过肥嘟嘟的他食到变污糟猫，劲得意，最终要妈咪帮手抹嘴仔。

杜氏夫妇好锺意食Tea
食饱急去厕所，在旁跟男友人倾紧公事的Alex，立刻戴番口罩陪囝囝去wee-wee；放完水的AJ好轻松，大摇大摆揈住手仔、拖住爹哋行返餐厅，而Alex似乎都见怪不怪。最后逗留约一小时，一行5人终于埋单返屋企。而另一日下午3点半，杜氏夫妇再现身同一间餐厅，与一名女友人食Tea，其间3人交换手机睇相，畅谈甚欢，倾足一个多小时才埋单走人；沿途行去洗手间时，两个女人继续鸡啄唔断，Alex就默默尾随又搞吓顶Cap帽，去完厕所两公婆便乘7人车离开。