爆完金句罕谈屋企嘢 黎明被林海峰狠批：佢个女终会成为另一个男人嘅Fans

黎明红馆演唱会昨晚开锣，寰亚娱乐老板林建岳博士、「大刘」刘銮雄与太太陈凯韵（甘比）、陈慧娴、蔡一智、胡定欣、胡蓓蔚、DJ Donald等捧场。林海峰（Jan）担任首场表演嘉宾，大爆黎明（Leon）全新金句「噏To U」全场爆笑，大放正能量！

Leon介绍嘉宾出场亦与众不同，他说：「香港做TalkShow有几个大师，有一个大师就洗咗手，另外仲有一个今日嚟咗。所以见到大师，大师讲嘢我哋唔好出声，呀，你哋可以出声，但我唔好出声。大师叫我出声，我先至出声。大师今晚准备咗啲点我，令我更明嘅，高人点路。『嘉宾』通常系『请』嘅，升上嚟嗰啲叫『等嘉宾』，我示范一次咩叫『请嘉宾』，我落去。」语毕Leon降到台底，亲自陪林海峰上台，全场尖叫。

林海峰上台叫Fans欢呼，说：「畀啲声听吓先，我好耐无嚟红馆，两年啦！大声啲欢呼声，嘘声都得㗎，两年都冇听过。」全场起哄。他对Leon说：「你邀请我嚟，我好大压力。（点解呢？）因为第一场嘛，我惊令大家失望。（观众大叫『唔会』。）听落好似有少少失望，不过唔紧要，少少失望，喺今日嚟讲已经系好有希望㗎啦！」

「实不相瞒，Leon邀请我嘅时候，我第一时间推，因为『金句王』面前，叫我嚟真系献丑。但无办法，Leon直情打电话嚟，等我畀啲证据大家听吓。」然后林海峰拿出手机，播出Leon给他的Whatsapp语音留言：「阿Jan，Leon呀，方唔方便同我通个电话讲两句？」林海峰说：「我收到呢个电话嗰阵，仲以为银行打嚟，我话我唔使借钱。」

林海峰坦言与Leon私下不相熟，他说：「记唔记得我哋通电话，我唔知同你讲乜，因为其实我同Leon系唔熟，我话：『Leon，噏乜嘢？』Leon同我讲：『Jan，噏咩？Up To You啦！』佢系九秒九弹嚟！『噏咩呀？Up To You！』呢句嘢，我谂吓都真系几好用㗎喎！」

他立即以Leon全新「金句」套用于日常生活中，说：「例如情侣，另一半问你：『噏咩？』咁你点答？『Up To You啦！』；如果同人嗌霎，车厘子你嘅时候，你话：『你噏咩呀？』、『Up To You啦！』，你即刻收声。即系呢一个回应，既宾宾有礼、大方得体得嚟，有啲浪漫不羁，同埋有啲挑衅性。直情有啲似小学嗰啲『反弹闸住』。咁佢话『Up To Me』，咁我话OK返去谂吓啦，到时彩排再话畀你听点样啦！」

然后林海峰爆出Leon另一金句：「彩排彩排，都不及天意安排」，全场掌声。他说：「呢次系九秒八。即系黎明开Talk Show嘅话呢，佢一场噏咩呀？Up To You啦！个Show可以即刻完，然后啲笑声由八点半一路笑到十年之后，我啲呢度几个月，噏咗两个钟头，啲笑声呢度讲呢度散。『彩排彩排，都不及天意安排』真系金中之金，畀啲掌声！所以话『金句王』面前我无办法可以发挥到好大，但无办法啦，天意安排咗我嚟⋯⋯其实系黎明安排我嚟。上次好多谢Leon邀请我参与《顾家》MV拍摄，上次Hit rate系咪好高？唔关我事。」

话题一转到家事，林海峰说：「上次拍MV我哋冇乜机会同你倾吓啲屋企嘢，依家可唔可以倾吓？」Leon大方地说：「得，你讲呀！」林海峰说：「Up To Me呀嘛！点呀，屋企好吗？（大家都好。）细蚊仔好吗？（都好。）太太好吗？（好呀！）屋企姐姐好吗？（OK啦！）同我一样，我完全明白。（煮餸麻麻⋯⋯）唔系呀，系全屋企都女人，屋企阴气好重。」Leon点头。林海峰笑说：「有日我谂，天王全部都生女？（暂时见到系。）有趣嘅系：天王生女，佢个女系唔会成为天王嘅Fans，虽然我唔系天王，我都系过来人，可以同你分享吓。举例，刘德华千金大概十岁左右，我谂佢唔会唱《一起走过的日子》！舞台王者嘅小朋友好似得几岁？（好似同我嗰个差唔多大。）几岁应该系听《Baby Shark》，如果老窦日日Generation X，真系唔知做乜X㗎嘛！（无错。）你个小朋友几多岁？（三岁。）你返屋企佢会唔会对住你大叫『Leon』？（唔会。）有冇搵你影相？（唔会。）会唔会搵你签名？（唔会。）会，迟啲会签喺家课册！佢唔会成为你嘅Fans，但黎明会成为佢嘅Fans！」

他对台下观众说：「旧时你哋喺阿Mark嘅Studio、电视台、电台门口等Leon，有一日你就会见到Leon喺幼稚园门口等紧佢个女，每一日好似你哋旧阵时等佢咁样『出嚟未呀？』、『等咗好耐啦喎！』、『出嚟啦，出嚟啦，哎呀上咗车，跟咗保母走咗！』。然后到佢开骚，你就好似Fans咁扑飞，嗰个骚就系幼稚园毕业礼，即系杂锦骚，你炒飞都会买，坐家长位，个小朋友台上表演，唱快歌跳舞，只手揈吓揈吓，好熟面口？口擘擘咁！」林海峰扮Leon唱快歌时台风，全场爆笑，又说：「你成为Fans就会赞佢：『哎呀，跳得好好呀，好型呀！』Fans嘛，然后帮佢影相，实Q阻住就同实Q开拖，跟住追车，追校巴啦，送花畀佢、送公仔、送汤呀，送佢返学、送佢去公园玩。然后有一日会见到Leon骑住架单车喺公园走嚟走去追佢个女，就好似《甜蜜蜜》黎小军咁样傻痴痴。」

「然后小朋友开始长大，进入青春期，化妆、梳头、日日匿埋喺房、玩手机，呢个时候你知道：有咗第二个⋯⋯『豹哥』，于是乎黎小军就喺房门口『行近，我又怕惊动你，我又怕心难死』⋯⋯」，林海峰突然走音，观众爆笑，他解释：「点解走音？佢喝我下次叩门先可以开门呀！『立定决心以后分离，一生里头，谁是我的心中最美⋯⋯』，对住佢个女唱『往日的你』！」又说：「天王生女，最吊诡佢唔会成为天王Fans，佢个女最终会成为另一个男人嘅Fans。尘世间最痛苦莫过于此！就好似将『最受欢迎男歌手奖』畀咗嗰条仔咁，攞去啦，同埋个女一齐攞去呀，呢啲叫做『乐坛传承』呀！」林海峰妙语连珠，全场爆笑。