【独家】陪黑面女友行街被当透明　崔建邦又拖又揽𠱁唔掂谢晒皮

42岁人称「媾女王」的崔建邦（Amigo）与香港代表剑击运动员崔浩然胞姊Jessica Vivian Choi拍拖3年多，感情稳定的二人前年传出婚讯。近日他接受J2节目《Mean Talk》访问时，除重提10多年前涉打前女友「中巴」邝敏慧一事外，又直言视Jessica为结婚对象，仲暗示已为结婚做好准备。经一事长一智的Amigo现在对女友呵护备至，日前佢就同女友喺又一城行街，虽然女方黑晒面，但佢都好有耐性又拖又揽力𠱁对方。采访：谭壹致

虽然近日崔建邦忙于拍摄拳击比赛节目《Fight尽》，但佢都冇冷落女友。日前晚上8点，《头条日报》记者发现身穿白色「鸡翼袖」背心衬短裤的Amigo，与一身粉红色One piece披牛仔褛的Jessica，喺又一城拍拖行街街，惟女友全程木无表情，两人更不时「向左走向右走」分开行，未知Amigo是否激嬲对方呢？当日两人在首饰店前Window Shopping，望咗一轮，Amigo似乎睇啱心水想买畀女友，正打算走进铺头之际，Jessica却完全唔畀面，一个华丽转身就离开。

火药味浓
之后，任职英文老师的Jessica走去书店打书钉，在她专心拣英文书时，四肢发达企唔定的Amigo却于店中周围兜，忽然好雀跃地攞咗本儿童图书畀女友睇，结果对方都系冇乜反应，临走前，搞搞震冇帮衬的Amigo仲拎起一盒玩具系咁睇，唔啱用望吓都好。接着二人到LOG-ON睇宠物用品，他们各自拣了一包狗仔零食，再行多圈便去畀钱；随后再到超市逛，沿路搭扶手电梯落楼时，见女友仍面燶燶，Amigo即拖手又揽揽𠱁对方，无奈Jessica眼尾都冇望过他，去到超市仲绕晒手，火药味好重喎。