【独家】Rock友变偶像派冧功升级 Joey Tang行街见记者送飞吻
2021-07-08 19:15 
近年MIRROR人气爆灯，个个争住搵佢哋合作，之前太极乐队结他手邓建明（Joey Tang）于ViuTV节目《CHILL CLUB》中，亦以低沉Man爆声，与ToNick合唱「佬味版」的姜涛Hit歌《蒙著嘴说爱你》，成功获得不少网民大赞好正。未知唱完首「少男歌」是否心境都Sweet咗Young咗呢？早前他落铜锣湾行街时，当发现《头条日报》男记者在场，即学Idol向镜头送飞吻，好Cute呀！采访：梁志明
早前傍晚约5时半，将于8月假红馆举行《太极RAINBOW AFTER RAIN演唱会》的邓建明，趁得闲独自现身百德新街的I.T睇衫，夹开Band的Joey连睇衫都散发出Rock味，他擘大双腿扎行马，左手垂低握实部手机，全程斋用右手逐一拨开陈列架上的衫快速Scan，似乎Joey对外套都唔太感兴趣。
期待下次派心心
之后行前两步继续睇，十次有八次着白色或黑色Tee衬黑裤的他，终于扚住件黑Tee望多两眼，随即再扚起条黑裤𥄫𥄫，但结果都系唔啱心水又放低。最后在店内兜咗几圈，Joey问完女店员有冇货后，二人再吹多阵水，一共逗留约半个钟，他便两手空空地离开。临步出大门时见到镜头，Joey即向男记者挥手道别，仲忽然「Idol」上身隔空送飞吻，唔知下次会唔会派心心呢？
最新回应