【食得肉紧】朋友请食好西贺夺女歌手奖 郑欣宜兴奋到伸脷舔埋鲍鱼汁

肥嘟嘟郑欣宜(Joyce)个食相相当吸引，从面部表情联想到好味程度，网民隔住个「芒」都感受得到。昨日欣宜喺youtube自家频道上载一条生活日常片，片中直击day off嘅欣宜一日里面所做嘅事情，包括下午去朋友店铺拣水晶饰物、去探望契仔、夜晚相约大班朋友，其中一人喺加拿大返港，大夥儿去食Omakase（厨师发板），见欣宜一啖汽水一啖海胆，食得够豪开心到不得了，除此之外，又食到厨师发板嘅特色鱼生寿司、杨栋蟹洋葱汤、膏蟹、鲍鱼等，欣宜开心到手舞足蹈，掩面、舔手指、拍手掌乜都齐，仲唔怕失仪，火速舔埋啲鲍鱼汁，相当搞笑，而她擒青抢食串烧行为，即被朋友喝止，怕她会拮亲个嘴。Joyce猛话好好味，形容好食到嬲，好食到笑，更兴起话好食到好想拍人，最后拍打身边朋友个pat pat嚟「发泄」！

对欣宜嚟讲昨日系好重要日子，因为她快要闭关拍新歌MV，𠵱家系时候放松一吓。以前欣宜乜乐器都唔识，她又自爆学紧弹钢琴，啱啱学到第2堂，最想学到Chopin(萧邦)，平时开住Chopin嚟听心情会平静啲，希望有日可以自弹自唱。