【独家】感激肥姐造就开红馆Show机会 胡枫老当益壮三高糖尿乜都冇

2018年，胡枫(修哥)以86岁高龄创下在红馆最高龄开骚纪录，今年修哥再刷新纪录，以89岁之龄于6月19日在红馆举行《胡枫约你开心派对2021》。修哥相当兴奋：「真系谂唔到，70岁后竟然有机会3度喺红馆开演唱会，最紧要有得娱人娱己，我好陶醉，一啲都唔觉得辛苦。」采访：方骞平 摄影：谭壹致 场地：艺力琴行@新蒲岗

胡枫获唔少契仔契女及行内人爱锡，演唱会原定去年举行，主办公司老板孙敬安及卢敏仪（Money）经已同修哥拍好宣传海报，兼且同寿星公切饼庆祝88岁生日，最终受疫情影响而押后一年，就算只容纳七成半观众，但孙敬安及卢敏仪坚持show must go on，当系送畀修哥89岁贺礼，修哥好开心笑着说：「尤其系No Money(卢敏仪)对我真系好好，好话唔好听，89岁唔开心点得，仲有几多年呀？我都希望观众开心。」

开骚冇压力
修哥自爆，19年前初登红馆开show由肥姐促成好事：「其实我70岁前都冇谂过可以喺红馆开到show，第一次70岁喺红馆演出系由『演唱会之父』张耀荣成全，记得大寿前夕，有朋友提议话当留个纪念，当时我仲话边敢提出呀？自己讲出嚟都傻啦！点知俾肥姐听到同耀荣叔讲，至今做开有条路。肥姐好锡我，样样都『修哥前，修哥后』，佢尤其对住我个孙仔嗒晒糖，所以喺温哥华嘅儿孙，年年都会去拜肥姐。」修哥不担心健康及体力问题，他开心到手舞足蹈说：「最近做咗磁力共振检查身体，证实健康良好，冇三高、冇糖尿，收到报告时我几开心呀！虽然89岁仲开到演唱会好唔简单，但只要背熟歌词就冇压力，𠵱家只求天天开心，我锺意唱歌，可以唱怀旧歌畀观众听，好Enjoy。」