【小心笑死】同ERROR卢觅雪Agent L.齐拍广告 古天乐疯狂跳舞劲玩得
2021-06-14 15:15 
古天乐（古仔）上月中到九展欣赏MIRROR尾场演唱会，骚后ERROR成员193更成功向古仔「集邮」随后在个人社交网上载古仔搭着他肩膊影的合照，并留言：「知我咩料啦。」即引来不少网民热议。估唔到话咁快193就有机会同古仔合作，趁住今日端午节假期，古仔、ERROR四子、以及卢觅雪（雪雪）分别在社交平台上载了合作拍摄广告片段。
片段甫开始见肥仔瞓在地下大叫「好热好热」，然后见保锜敷冰、Agent L.（《ERROR自肥企画》导演曹梓冲）继续以黑衫黑裤黑超扮晒「实Q」造型现身，193施施然揸住风扇出现话：「冇错！佢就系我『实Ｑ』，feel到啦！知我咩料啦！」扮晒巨星出场。画面一转就见到古仔坐在雪柜隔篱吹住风扇问193，「咁你又知唔知我咩料呀？肥Doi，去开冷气。」肥仔即望住镜头话：「咁黑都怕热嘅！？」明窒古仔，古仔即用手拍打肥仔块面，之后雪雪出场问众人，「系咪热呀？边个要雪雪？」ERROR及AgentL.一齐指住古仔。雪雪兴奋走向古仔身边，古仔一边笑一边无奈讲：「真系正到不得了！」众人即起哄叫古仔热就除衫，搞到古仔反问：「咩广告嚟㗎，成日叫人除衫。」
另一短片中，他们全数换上夏威夷装，又唱又跳，古仔相当玩得，除了同卢觅雪攞住砂槌对跳外，自己又举晒手扭晒腰咁跳，而193更扮古仔名曲《今期流行》中大跳的拜神舞动作，即被古仔一脚踢开，而片中所见，古仔似乎特别锺意撩肥仔玩，亲自从后捉住肥仔外，见193捉住肥仔时，古仔又拎住沙槌打肥仔个大肚腩，相当搞笑。最后跳完一轮，古仔叫Cut拉队收工，肥仔大叫：「我请食沙律。」193在IG再提古仔写道：「而家知Koo Tin Lok咩料喇，连我实Q都抢埋。Alfred Cho（Agent L.）你唔实Q我，会唔会好冇安全感？」阿Dee则在IG留言：「作为一个演员，无时无刻都要准备好，古生今次可能系嚟casting㗎！上大银幕指日可待。」连Agent L.也在IG出post：「第一次见到古生真人Not Secured！」
最新回应