【独家】老婆行开咗沙滩家庭乐遇一号波黄浩然面燶睇实囝囝同帐幕

2021-06-12 00:49

要数圈中好好先生，45岁黄浩然肯定系其中之一，同形象指导太太莫家嘉（KaKa）2005年结婚16年以嚟，浩然完全零绯闻，诞下两个仔仔后，工作以外一切以家庭为重。刚刚拍完新剧《家族荣耀》的浩然，昨日（11）又出动陪太太及两个仔去沙滩享受家庭乐，由于下午天文台发出一号戒备信号，沙滩特别大风，但太太行开咗，搞到浩然一边要睇实两个仔游水，一边又要顾个沙滩帐幕，两边走好鬼忙，好好先生都变得面燶燶躁躁哋！采访：张咏森

浩然前年签约古天乐旗下经理人公司后，工作接唔停，刚刚又完成跟张智霖、罗子溢（罗仲谦）和杨茜尧（杨怡）夫妻档合作新剧《家族荣耀》，近日终于可以放假休息，当然第一时间陪屋企人，见近日疫情回稳，昨日又难得冇乜落雨，于是一家四口去南湾同阳光玩游戏。

睇见都觉得攰

黄氏一家下午3点几到达沙滩，浩然同太太相当合拍，两人先夹手夹脚开好个沙滩帐幕，浩然就摆低晒啲行装，太太就帮两个小朋友搽太阳油。本来一切安排得好好，浩然仲即刻除掉上衣，大晒结实肌肉，但同行友人囡囡整伤只脚，KaKa即陪伴去救伤站治理伤口，顺便攞两个仔个浮牀去打气，于是就行开咗。

本来浩然一个人照顾住两个小朋友落水玩，完全冇难度，不过由于挂起一号风球，海滩不断吹起大风，沙滩帐幕特别食风，差点被吹起，浩然顾得睇住囝囝落水玩，又要不停𥄫住个帐幕，其间仲试过几次帐幕差点被吹走，在水边陪囝囝玩的他要急急脚走返上沙滩整好个帐幕，搞到囝囝要大叫他，他怕囝囝失礼即做动作叫停，呢幕睇见都真心觉得几攰。

浩然同个沙滩帐幕大战咗几个回合之后，疲于奔命的他见到太太终于现身，即时顿起一家之主格做决定，向KaKa呻话：「可唔可以唔要个帐幕呀？系咁风起呀！」KaKa当然尊重老公意见啦！不过，两个仔仔一于好少理，因为妈咪已吹好浮牀有得玩啦！