【独家】传跟洪永城C君组制作公司 曾志伟染指TVB剧组推「自家」新剧

68岁嘅曾志伟今年初强势回归TVB做副总经理兼行政委员会特别顾问，奉命掌管及改革Out晒嘅综艺节目。志伟「收复失地」3个月，「死敌」余咏珊何哲图夫妇败走，正当大家以为「有线帮」冇得留低时，余咏珊昔日爱将洪永城(Tony)突然「升呢」做新剧《凶宅清洁师》监制、编审及男一，可以身兼三大要职，外传因为曾志伟秘密染指TVB戏剧组给予「亲信」机会。日前剧集在尖沙咀拍外景，冇份拍但喺现场监场的Tony就否认《凶》剧同志伟有关。采访：方骞平 摄影：梁志明

原来一向百足咁多爪嘅曾志伟，已跟香港史上首套BL剧《大叔的爱》监制兼编审卢思麟（Tommy）及创意无限嘅C君(郑诗君)成立「劳诗动众」媒体制作公司，洪永城系团队要员经常坐埋开会掟故仔，度剧本至三更半夜，然后Sell畀电视台，曾志伟及Tommy最爱Tony嘅新思维及C君嘅鬼才。悬疑惊悚剧《凶宅清洁师》属「劳诗动众」产物，由曾志伟低调喺背后发功力推下撮成好事，是TVB拍摄中的13集外判网剧。剧情讲述新潮法师洪永城、李成昌及欧阳伟豪(Ben Sir)为客人清洁凶宅，慢慢搵出十几年前，因为鬼怪事件搞到屋主家破人亡嘅原因。由于题材创新，更被TVB视为《今宵大厦》后突围嘅神剧。


Tony监场
原先《凶》剧由「劳诗动众」的卢思麟及洪永城双监制，Tony顺理成章做埋「男一」，C君就主演兼编审。不过，Tony唔想「身份」太张扬，好快将自己除名，仲喺IG上载跟卢思麟及C君合照交待：「介绍返，呢两位我大佬，两位都系编审同监制，左边嗰个C爷教我讲嘢，右边嗰个卢生教我做嘢。至于我，系负责买下午茶嘅，晏啲食乜？」变身幕后指挥嘅Tony日前现身尖沙咀外景场地打点，𥄫吓傅嘉莉及Ben Sir拍摄情况，相当紧张。Tony强调唔想以监制做噱头，反而著重剧本要扎实。对于盛传剧集同曾志伟有关？Tony即尴尬避谈：「总之套剧唔关曾志伟事，卢思麟系By Project做，我亦唔方面交待劳诗动众嘅股东情况。」

C君邀拍
当日拍摄场口讲述半红不黑嘅KOL傅嘉莉(Kelly)为咗求Ben Sir合作，喺车门及车内同几位助手拉拉扯扯，唔畀Ben Sir离开。作为女一嘅Kelly好进取，唔止晒腿及纤腰，仲喺大热天气下丧跑、起飞脚，仲揽住阮政锋相当入戏。她对本报记者说：「为咗保持fit爆状态冇啖好食，好惨。」而著住西装嘅Ben Sir热到流晒汗，仲话可以同年青人团队合作好开心。问到可有改吓剧本？他即说：「我边敢改呀？呢次系最多戏份嘅角色，试过想改小小台词嚟寸吓阔太，但编审C君话，剧情系要硬食富豪畀你嘅嘴脸，咁讲出道理来，我咪要投降罗。」Ben Sir透露C君找他拍剧，「佢话一路写一路谂住我，大家从未合作过，可能脑电波有共鸣，佢提我眼神要坚定啲，拍呢套剧学到好多嘢，我对佢好有信心，亦知道洪永城系监制，反而冇理过创作团队背景。」Ben Sir仲大赞剧集得意位系唔使有真鬼，靠气氛嚟打造悬疑及惊吓性都好吸引。