认声大大劲Hyper影响唱歌　陈凯咏努力改善大头虾性格

陈凯咏（Jace）日前接受许文轩（Edmond）主持的TVB娱乐新闻台节目《StarTalk》访问，她表示首张实体专辑《PROCESSING》记录了自己出道至今的过程、
转变和唔同面向。谈到唱片造型以绿色为主，Jace笑称：「我系一个后知后觉嘅人，自己锺意绿色都唔知，公司开会时，佢哋好快就话我系属于绿色。其实绿色真系好啱我，因为绿色对我嚟讲系一个有趣嘅颜色，第一时间会谂到环保、自然，而我又锺意真实，亦希望畀人感觉系一个有生机嘅人；而萤光绿色畀人感觉好前卫、好难着上身，但我就成日着绿色上身，可能会令人抗拒同有鬼五马六嘅感觉，所以绿色系代表我咁极端嘅面向。」

新歌《I Wish》属轻快跳舞类型，自中学开始跳舞的Jace却自言称不上好锺意跳舞，甚至有段时间质疑自己，「如果好锺意跳舞，点解唔系日日练习？点解自己只系去到呢个Level？其实应该系唔够锺意！而教小朋友跳舞系因为自己好喜欢小朋友，借佢哋过桥。除咗教佢哋数拍子、拉筋、听音乐之外，仲会教佢哋操行、尊师重道。我入咗行之后就停咗教班，有时会喺度谂，几时先有机会系工作入面再接触小朋友呢！」

说到要改善「忘我」的性格，Jace表示：「平时讲嘢太大声，情绪太高涨，会影响唱歌，呢个真系要改！之前试过睇演唱会疯狂大叫，我系一个睇演唱会唔留力嘅人，太兴奋，最终搞到第二日出骚沙声唱唔到。另外，我成日都唔见嘢，又唔补妆，搞到同事成日帮我执手尾，呢啲大头虾性格我已经改紧！」