【独家】夸赞跟姜涛成就同样超越 林作备战拳赛禁裕美埋身

林作跟「百亿富三代」锺培生将于9月18日上演百万拳赛《林锺大战》，日前仅受训3个月的林作参加《Energy Fight 2021拳击业馀赛》作热身，虽然于附加赛最终回输咗，但扬言唔会影响出战信心。挟住网民急转弯的支持，林作信心满满大声说：「我一定要打残锺培生，要终赔生(命)《赔钱赔命》！」采访：方骞平 摄记：张咏森 场地：Bomber Gym

虽然《林锺大战》尚有4个月才举行，但两人连场「牙骹战」花生指数极高。日前林作与19岁年轻对手黄明隽大战4个会合：「嗰次喺我哋(教练李俊亨Henry）唔知情下，锺培生嚟踩场挑机仲做埋直播，指住我哋话『全部都可以knockout』，真系好可笑，佢凭咩呀？其实我系留力策略，主要去攞吓感觉，虽然我成日开玩笑，但经历过第一场热身赛之后，我下定决心，一定要打残锺培生，因为全香港人都要求我赢，我极度得民心，𠵱家行过马路、球场、街上，啲人都要求合照，同我讲声『加油』。」林作自信到爆仲拉埋「ViuTV国宝」姜涛嚟讲，他说香港娱乐圈目前得两个成就超越嘅人，都系两个字，「一个系姜涛，一个系林作，姜涛喺香港有好多fans，有钱fans买电车广告同佢贺寿，但林作只得一个超级fans，佢系锺培生，佢会直接畀『一球』我！」

年几冇性关系
讲到百万拳赛，林作自称有好多必杀技KO锺培生，他笑说：「讲你都唔明㗎喇！」语毕又爆响口：「我唔咸湿，我唔系成日要搵女搞，所以可以保存好多实力，女友裕美帮我做到嘅嘢，就系唔好搞我！」问到系咪要戒色备战？他和裕美有默契地齐声说：「不嬲都少！」林作自爆对上一次「行埋」已经系年几前：「相比熊猫30秒至5分钟嘅交配时间，我哋更短，我冇乜呢方面兴趣。」对男友「零性趣」发言裕美唔失望：「我冇乜呢啲需要，而且锺意佢为人好，对我好，睇人唔好睇表面。」

奖金开栋笃笑
打赢锺培生就可以袋走100万，而林作已谂定点用嗰100万：「好多人唔锺意《培生培心》每月收800蚊会费咁贵，之后又冇乜回馈，好多会员退会嚟搵我买保险，我决定拎部份奖金嚟建立我个《赔钱赔命》YouTube频道，免费招收会员，一于做大佢。我注定系佢克星，佢人生由我打赢佢一刻开始走上不归路，我要等佢学识人生嘅重要一堂『有钱冇用，男子要才多过财』！」另外，林作又谂好赢咗点庆祝：「会完成一个人生小梦想，就系开林作栋笃笑，由锺培生恰我系文弱书生，再以佢口中嘅Little Girlfriend去揪低佢，到时请埋佢上台烧黄纸叫我契哥，到时一齐笑吓。」林作还加重咗10倍人寿保险：「𠵱家保额系1000万，受益人写裕美，另外，亦会加强保险事业，有呢啲押喺底，就好放心冲去同佢死过！」