【对灯发誓】发文反击韩君婷迫迁令指控 蔡国威嬲爆：我问心无愧

45岁前亚姐韩君婷(鬼妹)被爆出因欠债40万元，月前申请破产。而她曾解释，申请破产原因是不想连累朋友，怕朋友会受到财务公司骚扰。破产后她突然搬离跟有情有义朋友蔡国威公屋住所，租住铜锣湾劏房过新生活。原来两人已反目成仇，有指在蔡国威知道鬼妹破产后即向她迫迁！韩君婷惟有执埋包袱搬窦，失望得要unfollow蔡国威嘅社交平台又铲走两人的合照，廿年友情不再！今日凌晨时分蔡国威亲撰「Q&A千字文」，以自问自答方式逐点反击韩君婷指控，字里行间蔡国威相当激动，甚至可以对灯火发誓冇迫迁：「我问心无愧！由最初我只系本著一心帮助好朋友，希望可以渡过难关，一直回答传媒都相当保护，但竟然换来今日呢个对待…」他更贴出照片写著「你对人再真 总有人不领情 你对人再好 也有人不感恩」的字句，对「韩小姐」以怨报德言行感到十分委屈。

逐点反击不实讲法

蔡国威提出4点，用千字文反击韩君婷迫迁论。

1) 呢7个字「你究竟几时搬走?」
我可以对灯火发誓，完全冇讲过，当日系韩小姐自己亲口同我讲话搵到理想职业，可以养到自己，然后早一晚同我讲:「听朝11点我会搬走，多谢」

2)有畀4位数字家用。
一直以来我回答传媒嘅，我可以重申一次，由第一日佢搬来同我住，我已经同佢讲，我供楼、水电煤各方面嘅开支都唔需要佢畀，我仲要因为咁每月额外租咗迷你仓，将屋企杂物搬过去，令到空间可以多啲，每个月佢会放低一千蚊畀我，有时多五百，唔系我要求嘅，系佢自己当系补贴下一啲杂费，咁你摆低我咪收，就算六合彩停期间，我自己屋企所有开支都应付自如，我根本冇需要捱面包。

3) 韩小姐话不想被抹黑，唔可以再讲大话包容我，唔想保护我自尊伤害到自己而爆出真相??认清我真面目，唔使瞓梳化??
自从佢申请破产新闻以来，我回答传媒都系祝福，尽量唔讲出真相，何来抹黑??一个人牺牲自己私人空间，冇条件畀你住两年，我一开始仲话畀房你瞓，你自己话瞓厅都得，你自己唔长进唔脚踏实地，自己坚持辞职赖疫情，我做朋友都仁至义尽，原来呢个真面目系你唔想见到嘅。

4)unfollow IG。
我完全无做任何动作，我一直唔会做埋啲咁小学鸡嘅嘢，亦唔会成日check住边个unfollow我或我要去unfriend人。」

最后我要讲一句，虽然我唔系咩富有人家，能力所及，可以帮，我都尽量帮，系需要你歌功颂德，但点解要以怨报德？

蔡国威获网民力撑

唔少网友力撑蔡国威，叫他加油，只要问心无愧，努力做好自己便可，又话相信他善良的人品。相反韩君婷反而被网友闹爆，力斥她垃圾唔上进反而推卸责任在帮你的人身上。