「投诉」歌迷上载全损音质影片　张敬轩《Chill Club》献唱惨变黐脷筋

张敬轩（轩仔）最近走匀两台的音乐节目，作客ViuTV音乐节目《Chill Club》的一集昨晚播出，靓声当然令一班观众听出耳油，仲有粉丝将他献唱《黄色大门》一曲的片段，特意上载到YouTube同大家开心Share。不过，此举似乎引起轩仔「不满」，事关影片被压缩至「Fi Fi」声，其靓声亦变成「黐脷筋」！轩仔昨晚在IG转发该片，并以「你话人生究竟有几无常？」为题，搞笑留言：「正当全世界都喺度玩紧高清影像、无损音质嘅时候。我亲爱嘅歌迷大姑帮我po上youtube，竟然系360p、全损音质兼黐脷筋嘅Chill Club，以下读『烧咳』。」

接着，轩仔抵死地扮「黐脷筋」腔续说：「喎茂捻过喎大呀次嗨ViuVeeVee嘅烧咳就梗让茂左。」此句可翻译为：「我冇谂过我第一次喺ViuTV嘅《Chill Club》就咁样冇咗。」他又Hashtag「巧地地个口琴intro变_咗唢呐」、「JoeyTangSir我对你哋唔字」、「条脷硬过我条命」，继续爆笑向上传影片的「经手人」投诉！搞到今朝，被洗脑的轩仔都忍唔住于IG Story，分享亲身演绎的「黐脷筋版」《黄色大门》！对此，一班网民都纷纷留言笑嘲：「姐姐可能听得明呢个版本呢」、「呢个version要上冠军歌」、「轩公你d门牙漏风」、「笑到标眼水！」等。

轩仔压缩版《黄色大门》：https://www.instagram.com/p/COGc2GEDo8v/