【独家】花姐凑仔苦与乐（一）之 MIRROR令梦想成真

ViuTV《全民造星》出身的MIRROR和ERROR近期爆红，节目监制兼经理人花姐（黄慧君）肯定是最大推手，《头条》一连多日同花姐细数「凑仔」苦与乐。2018年11月3日MIRROR正式出道，宣布12月举行首个演唱会，花姐陪12个仔接受《头条》访问，当时花姐讲了很多对MIRROR期望，当时希望他们的出现会令娱乐圈变得更好，想不到短短两年半，囝囝已成功帮花姐实现了不少梦想，缔造了不少奇迹。撰文：杜淑霞 摄影：谭壹致

2018年花姐说：「我以前系四大天王年代做PA（助理编导），真系有啲情意结，当年佢哋上《劲歌金曲》就群情汹涌，但系𠵱家冇晒呢啲嘢。」

现在每次MIRROR成员现身，都会有追星情况出现，花姐又有何感受呢？

花姐说：「梗系开心啦！同埋愈嚟愈多（fans）。开头做完《造星》有班fans，呢班fans都支持紧佢哋，跟住仲慢慢见到唔同嘅人𠵱家都系佢fans！数目嘅增加系一定会开心，唔止姜涛一个，见到MIRROR其他成员IG嘅follower，或者跟佢哋嘅都开始有增加，系好戥佢哋开心，但系我仍然不停咁提醒佢哋，你哋行紧条偶像嘅路，会有好多fans跟你哋，好锺意你哋，我会好似严母咁不停迫佢哋学嘢，你一定要话畀人哋听有实力，唔可以好似初初行出嚟咁样，觉得你哋系班靠外表嘅artist，我希望你下次访问我时再playback畀我睇，原来我可以做到，𠵱家佢哋系一班有实力嘅偶像。」

2018年花姐说：「如果将佢哋摆埋一齐，可能会令香港乐坛冇咁静。」

果然MIRROR出现令乐坛风起云涌，出道两年已经在乐坛颁奖礼夺大奖，花姐见到班仔得奖时有何感受？

花姐说：「我好记得MIRROR初出道过咗两个月就《叱咤》颁奬礼，我哋一齐行入去后台时一打开门，全部人静晒望住我哋，佢哋冇乜嘢，但系我觉得MIRROR系唔属于乐坛，我就同自己讲希望有一年嘅《叱咤》，大家会认同我哋，我哋系属于呢个乐坛，有为呢个乐坛唱歌跳舞表演。今年MIRROR有人认识，同埋好多谢啲DJ支持，过咗《叱咤》颁奖礼后，我哋更加受到以前唔认识我哋嘅人注视，系好开心，我有为呢件事感动到喊，攞奖后感动同担心到喊，因为增加咗我压力，我应唔应付到我嘅工作量？我可唔可以带佢哋行得更好嘅路呢？以前我同自己讲我系一个冇经验嘅经理人，我好惊行错路，但系𠵱家我仲惊，佢哋系有能力行得好，会唔会因为我错误决定令佢哋死呢？嗰种压力又唔同咗，又大咗，我只可以承诺为佢哋做到最好，我可以搵到最好嘅班底帮佢哋，我希望仲有气有力，可以尽力帮佢哋令佢哋行得更加好。」

对于姜涛年仅21岁破纪录成为最年轻「叱咤最喜爱男歌手」及「叱咤最喜爱歌曲」双料得主，更引发「「姜涛效应」，更有人形容将会是MIRROR时代，花姐又有何感受？

花姐说：「𠵱家我得到成果系比我预期多，我冇谂过MIRROR过咗两周年后，我完全冇谂过姜涛会攞咗『我最喜爱男歌手』，我仲记得去颁奖礼之前，同姜涛、Ian讲，你哋上年已经竞逐新人奖，阿姜你已攞到新人奖，照历史嚟讲你唔会有机会上台，我自己系咁预计件事，所以姜涛喺两年后攞到「我最喜爱男歌手」同「我最喜爱歌曲」，对我同姜涛嚟讲系好大嘅bonus，亦系好大推动，努力原来有人睇到，令到你大力啲行。虽然有部份冇我预期咁多，但系都有啲位我系未行得未够好，例如：我唔可以将12个成员完全喺同时间推出，令到佢哋有各自各嘅路，好老实，有啲成员仍然见到佢唔够知名度，或者唔系好够job。我同自己讲畀多两年我，MIRROR 12个加埋ERROR 4个，佢哋一定可以喺娱乐圈唔同部份会见到大家，我希望佢哋喺娱乐可以有唔同工作，令到多啲人认识佢哋。」

花姐究竟觉得那个MIRROR成员发展得未够好呢？

「第一个应该有机会系Jeremy（李骏杰），佢系好有特色嘅歌手，可能以前黄耀明或者张国荣年代会有呢类歌手，妖妖哋咁，佢唱歌好稳阵，跳舞亦好，好全面，性格亦都好，佢系应该有机会，好多fans都DM我，点解你唔畀机会Jeremy，当然背后有好多原因，我一系就唔推，一推出嚟我唔可以畀佢有机会失败，我想等件事ready先。第二个系Tiger（邱傲然），佢系默默耕耘咗好多，佢为自己准备咗好多，机会系畀有准备嘅人，佢系值得有机会。其他都有佢哋工作岗位，Frankie（陈瑞辉）同Alton（王智德）就综艺，我同公司商量觉得佢哋系适合综艺，其他监制反应都OK」

2018年花姐解释未有安排姜涛和Ian（陈卓贤）个人发展原因，「佢哋𠵱家实力，究竟可以行得几远呢！？趁喺呢度（MIRROR）有咁多资源，同埋咁多兄弟支持，储多啲经验同弹药，咁将来会有实力行远啲，实际过𠵱家趁有个势就行出去。」

花姐有冇后悔过当日决定呢？

花姐说：「我𠵱家谂番我系冇错，好彩我嗰时坚持，因为姜涛系个完全唔识表达自己嘅人，唔系好识点样同人相处，佢甚至接触嘅音乐都唔多，当佢入咗MIRROR，接触好多兄弟帮助佢习惯同人沟通，接触到譬如Lokman原来锺意呢啲音乐会跳呢啲舞，佢同11个兄弟可以学到好多，呢个学习过程令佢睇多啲嘢，𠵱家会发现佢无论做访问，或者同其他artist沟通未必系好好，但进步咗好多，所以我觉得冇错，迟半年单飞唔算太过份。Ian，佢可能有能力比赛完出嚟单飞，佢系好有才华，但嗰阵唔系属于全面，属于创作歌手，但𠵱家睇Ian除咗好有才华嘅创作歌手，跳舞都一路进步紧，唔排除将来唱到啲快嘅R＆B，可以跳舞，佢𠵱家识装扮自己，觉得要练肌肉，所以我都冇后悔。」