【独家】拍《不日成婚》牀戏零避忌卫诗雅陈家乐被误当曾拍拖

2021-03-31 23:00

卫诗雅跟陈家乐向来老友鬼鬼，最近在英皇电影《不日成婚》中再度合作，诗雅更首度以策划身份参与制作，但她笑指没提议搵陈家乐做男主角，而是导演陈茂贤看到两人私下相处觉得好啱角色关系。他们又自爆因太老友，拍牀戏都零避忌，连工作人员都开盘估两人曾经拍拖。不过，两人对婚姻态度刚好相反，近期跟连诗雅传出绯闻的家乐坦承恨结婚，反而诗雅会选择不婚。撰文：杜淑霞摄影：谭壹致发型:WilTam@Indulgence(诗雅)、Kenrick Siu(家乐) 化妆：Miko Wong(Cyrus Lee Team)(诗雅)、Khaki Yan(家乐) 服饰：英皇珠宝、Initial(诗雅)、Polo Ralph Lauren(家乐) 场地：英皇钟表珠宝中环旗舰店

身为策划的诗雅，最初没有想过搵陈家乐演男主角，「佢拎嘢畀我，我哋喺导演面前有啲交流，导演就话戏里面对couples相处方法就好似我同佢现实咁样，话睇吓家乐哥有冇期（陈：哗！你几衰格𠵱家！）参演吓啦！但系佢个期都难就㗎！全部演员、工作人员都要就番佢个期！好多谢你呀！」

婚姻态度相反

访问时，两人互窒斗嘴，诗雅坦承相处方式有助投入演出，她更自爆：「我哋有啲小动作、相处，有场叫做牀戏，完全冇避忌，佢哋就觉得你哋一定曾经一齐过！（陈：佢哋开埋盘，但系佢哋输晒罗！我哋梗系冇一齐过啦！）反而如果一齐未必咁样。」

戏中两人饰演拍拖同居多年情侣，但对婚姻态度分歧闹出不少笑话，不过现实中两人对婚姻态度刚好相反，恨结婚的竟然是家乐，「我系期待美满婚姻，可能我几锺意有人喺我隔离一齐生活，经历每件事都会想有呢个人喺度。（唔似角色「阿佳」咁惊？）其实惊咩呢？！我又唔觉！我系几年前已经好想有家庭，好想有小朋友，好期待呢件事。（搵到好对象先咁谂？）唔讲，哈哈！我见到同学仔带住小朋友去踢波，呢件事系几开心，我自己都期待，但都要工作稳定先会谂。」反而诗雅好惊结婚，「我想像唔到同一个人相处咁多年，我见到啲couples嗌交令我对婚姻有恐惧，点解要咁辛苦，呢点我谂唔通。」